Tinreng

Sawhkhawk (April 21, 2019)

Admin - Apr 21, 2019

Sawhkhawk (April 21, 2019)

Sawhkhawk of the day
Tun MP inthlan zawh takah khan Congress politics thiamzia kan hmu leh tain ka hria. ZPM-in thawm lian tak an han nei hman a, mi pawhin kan bawh a, khawpuia an chak dan kan hria a, thingtlangah pawh an par chhuak mek zel a, chutih lai chuan Congress chuan thiam takin an han thlem a, CAB tih vel hmangin ram dinhmun an han sawi derthawng tak tak a, a tawpah chuan ZPM hming pu siin an lut leh dial chu a ang khawp mai. Tunah chuan ZPM-a ruh tak takte kha chu an PC leh daih tawh ang a, an ZNP leh daih tawh ang a, ZPM boruak tha kha chu a awm leh tawh miah lo vang. MNF chu pawl hlun an ni a, tihdanglam mai hi an harsa ve tawh ang a; mahse, pawl thar dang lian zel tur hi chu Pu Hawla leh a hote thluak hian an dal thiam khawp mai. Inthlan lai pawh khan candidate an thawh a, campaign leh a hah ber ber kha chu ZPM-a mite deuh vek an ni maiin ka hria. Mi dang tha rin pawh an thiam asin aw… -Masiama Hnamte

Pu Hawla a thiam ka tih em emna hi chu, Congress ni lo, pawl thar lo ding, chak tak tur pawh hniam a thiam em em mai hi a ni. Tunah pawh hian a lang niin ka hria a, khati khawp khan ZPM boruak kha a lian hman a, khawpuiah phei chuan bial zawng zawng deuhthaw an la kha an la a, inthlan vawi khat chuhnaah chuan ropui tak an ni a; mahse, tunah chuan an pawlah a seng lut a ni leh deuh ber tawh a, ZPM tana vote-tu tam tak khan tun MP inthlanah pawh khan an vote nawn tawh lo vang tih a chiang khawp mai. Thiam deuhva pawl dang lian tur tihtet daih dan hi a thiam tlat. - Sangtea

Kan NGO lian zinga mi, MHIP chhungkaw boruak chu a va mawi lo angreng ve aw… Chhungpui nu, khawtlanga rawn kai, lehkha thiam leh thenkhat phei chu officer lian, an pasalte atang ringawt pawha zahkai tak tak an ni hlawm bawk sia, hetianga an chanchin a thang hi chu a mak ngawt mai, hrehawm ka lo ti ve hle a ni. Tlawmngai pawl tia kan sawi thinte hi an inthlan dawnah hian hetiang boruak ang deuh hi sawi a awm ta fo hi chu a zia lo ngawt mai. - Nupuii

Mipain a awp loh hmeichhia hi chu an heti leh mai thin niin ka hria. Hmeichhe fin hi chuan tuikhur ral hi a lo kai tak tak lo deuh pawh a ni mahna, kan MHIP-te chu an inthlang thei tlat lo. NGO-a hruaitu nih duh tlatna ang rilru hi a inhmang ve lem lo tan chuan hriat thiam a harsa khawp mai, tlawmngai pawl kan ti a, Mizo tlawmngaihnaa, “Nangin i tlin zawk, i tha zawk,” tia hruaitu tur inzawn ngai awm tak a nih lai hian hetiang boruak hi kan hre ta zauh zauh mai. - Mama

Central YMA hi chu an inthlan dawn hian campaign tih thawm ang lek lek, conference kalna tur tumsak tih thawm ang deuh hi a awm thin a; mahse, sawi a ni mai a, inthlan thulh phahna khawp hi a la awm lo ni chuan ka hria. MHIP hi chu inthlan hmasak lamah pawh khan ram pumin an boruak mawi vak lo kha kan lo hre tawh a, tunah a aia nasa zawkin a awm leh ta a, a pawiin an pawl hmel a mawi loh phah nasa dawn tih hi a lang reng mai a. Hmana pawl rintlak nia kan lo hriat thin kha an lan dan a dang ta daih dawn hi a pawi takzet niin ka hria. - Mamuani pa