Tinreng

Sawhkhawk (April 28, 2019)

Admin - Apr 27, 2019

Sawhkhawk (April 28, 2019)

Sawhkhawk of the day
Hming thlak hi sawi ve mai mai ka duh a, tun lai hian MIMER hming thlak tumna a awm niin an sawi a, a dikin ka ring a. MIMER han tih hian a dik viau tho mai hian ka lo hria a, tute emaw duhsakna avanga hming puttir chiam hi thil tul niin ka hre lo. Pu Hawla Auditorium a awm a, hei hi chu an party ta, an party building-a mi a ni a, MIMER hi chu sorkar ta, mipui ta a nihna lai a awm a, tu emaw hming pakhat puttir tlat tumna hi party thil tih a ang ka ti a. A hming thlak duhtute party ka huat vang lam ni lovin, vantlang thil a nia, a tira a hming hi a dik sa em em tho bawk a, tuna a awm ang hi a tha viauin kei chuan ka hria a ni. - Masiami Sailo

Pu Hawla a thiam ka tih em emna hi chu, Congress ni lo, pawl thar lo ding, chak tak tur pawh hniam a thiam em em mai hi a ni. Tunah pawh hian a lang niin ka hria a, khati khawp khan ZPM boruak kha a lian hman a, khawpuiah phei chuan bial zawng zawng deuhthaw an la kha an la a, inthlan vawi khat chuhnaah chuan ropui tak an ni a; mahse, tunah chuan an pawlah a seng lut a ni leh deuh ber tawh a, ZPM tana vote-tu tam tak khan tun MP inthlanah pawh khan an vote nawn tawh lo vang tih a chiang khawp mai. Thiam deuhva pawl dang lian tur tihtet daih dan hi a thiam tlat. - Sangtea

Mizo Kristiante hi kan va vannei em! Heti tak maia kan ram chhengchhia hi, lirnghing na pangngai ve deuh takte hian min han sawi zeuh sela, mang deuh phiar thei kan ni a, chutiang reng reng chu kan la tawk lo va. Thlipui ni se mi ram zawng aiin kan tuar nep a, a lawmawm a ni. Hnam tlem te ni mah ila miin Pathian hian ama rawngbawl tura a zawn chhuah ram nia an sawi thin hi ngaihtuah neuh neuh hian a dik tlata hriatna hi ka nei thin. Kohhran chak tak kan nei rengte hi mi ramah a awm lo vang, keini chu sual inti hle thin mah ila Kohhran aw hi chu mi sual tak pawh hian kan la ngai pawimawh zel zawng a nih hi.

Kan ramah Congress-in kum 10 ro an rel chhung khan mipui mimir mamawh hi min phuhruk zo lo ni maiin ka hria a. MNF pawh ka ni lo va, Congress emaw, ZMP lam emaw pawh ka tan teh run lo; mahse, ka hriat ve phak chinah mipui mimir mamawh ngaihtuak chak kawngah hi chuan sorkar liam ta kha chuan kan hrawn mek hian MNF hi a tluk lo deuhvin ka hria. An sorkar hmasak pawh khan gas duh duh huna lak tur khan kan kawtah an rawn phur zut zut a. Thil dangah pawh, mipui nghawng thilah hi chuan kan hrawn mek hi an tha zawkin ka hria. - Sylvia

Ka Huang’ hi a ngaihnawm thei hle mai. Amah hi a insawi danin, a upa ve tawh hle mai si a, thil a hre rei thei lutuk hi mak ka ti hle mai. Keini thalai zawk pawh hian kan naupang ve laia kan sikul awm dan kimchang hi sawi dawn ila, sawi thei lo hi kan awm nawk mai thei a. Sunday School-a kan awmna department leh kum zawng zawngte pawh, ani hi chu mi danglam tak leh thil chhinchhiah thei tak, chhinchhiah peih tak a nih a rinawm. A hriatreng bakah a chhinchhiah peih tih a chiang reng mai a, a ni leh thla, a kum nen, mi hming nena a sawi chat chat thei zel hi mi danglam tak niin ka hria. - Mazuali, TKK

Mi tam tak chuan Kohhran hi an han sel thin a, zu zawrh chungchangah te pawh mahni kuang lo nawrah te pawh kan chhuah a. Mahse, kan rinpui ber Bible kan chhiar chuan sakhaw hruaitu, Puithiamte kha an Lalten an rawn ber zel a ni a. Ram rorelna hi Pathian hian a kut ken tur a ni a, a rawngbawltute chuan an thawk thei kher lo vang; mahse, Kohhran thurawn hi chu a ngaichang thiam turah ka ngai. Tin, kan ramin hetiang dinhmun a thlen theih chhan hi hi Kohhran leh Kohhran mite tawngtaina rah a tih loh theih loh, Kohhran hi awm lo ta se, sorkar kan hrawn tawh tam tak hian tun hi min thlen ka ring lo. - Sampuia

Kristian rama thleng âwm ang lo tak tak hi kan ramah hian a thleng ta fo mai. Tun hnaiah khawlaia mi sawisak tih thawm a ri a, thihna hial a thleng a. Hei hi a chhan chhui dawn chuan thil tam tak a awm thei ang, a pawimawh ber chu chhungkua hi a ni ngei ang, chhungkaw inenkawlna tha atanga seilian naupang hi chu tleirawl sual kan tih angte hi han neiin han thle ve bak bak thin mah se, Pathian zahna chen hi an nei tlat thin. Kan ram a that zel nan hian Kohhran a tan a ngai a, a pui turin mahni in chhung theuhvah nu leh paten rim taka kan fate tana kan thawh hi a ngai bawk a ni. Kan tan rual chuan zu zawrh tih mai mai hi chuan min tibuai lo tawp ang. - Mamuani

Mipain a awp loh hmeichhia hi chu an heti leh mai thin niin ka hria. Hmeichhe fin hi chuan tuikhur ral hi a lo kai tak tak lo deuh pawh a ni mahna, kan MHIP-te chu an inthlang thei tlat lo. NGO-a hruaitu nih duh tlatna ang rilru hi a inhmang ve lem lo tan chuan hriat thiam a harsa khawp mai, tlawmngai pawl kan ti a, Mizo tlawmngaihnaa, “Nangin i tlin zawk, i tha zawk,” tia hruaitu tur inzawn ngai awm tak a nih lai hian hetiang boruak hi kan hre ta zauh zauh mai. - Mama

Tunlai hian kan thalaite hian infiamna lamah nasa takin hma an sawn niin ka lo hmu a, infiamna chi hrang hrangah hian changkang tak takin kan inlanin kan thiamna pawh a sang tawh hle niin ka hria a, a lawmawm hlein ka hria. Hetianga infiamna lama hma kan sawn theih nana tan latute hi tute nge ka hre chiah chuang lo va; mahse, fak an phuin ka hria. Chanchinbu hi chhiar ila, infiamna chi hrang hrangah Mizo hming hi ram pum huapah a lang mawlh mawlh reng mai a, infiamna pawl hrang hrang hruaitute thawhrim rah vek hi niin ka hria. - Ampuia

Central YMA hi chu an inthlan dawn hian campaign tih thawm ang lek lek, conference kalna tur tumsak tih thawm ang deuh hi a awm thin a; mahse, sawi a ni mai a, inthlan thulh phahna khawp hi a la awm lo ni chuan ka hria. MHIP hi chu inthlan hmasak lamah pawh khan ram pumin an boruak mawi vak lo kha kan lo hre tawh a, tunah a aia nasa zawkin a awm leh ta a, a pawiin an pawl hmel a mawi loh phah nasa dawn tih hi a lang reng mai a. Hmana pawl rintlak nia kan lo hriat thin kha an lan dan a dang ta daih dawn hi a pawi takzet niin ka hria. - Mamuani pa