Chawhchawrawi

Sorkar ui leh sakawr hnenah pension!

Admin - Mar 28, 2021

Ransate hi Poland-ah hian police, border guard leh fire service ten an khawi fingin an hmang tangkai hle thin

Chhiatrupna a thlena a hmuna mihring tang zawng tur te, mi tlan bo hnu chhui nan te, ruihhlo tawlh thin umzui nan te, puak thei dap chhuahna leh thil dang danga Polish sorkarin a chhawr thin ui leh sakawrte chu an kum a tam hnuah pension an siamsak ve dawn!

Heng ransate hi Poland-ah hian police, border guard leh fire service ten an khawi fingin an hmang tangkai hle thin.

An duh tawk an chhawr hnuah mi dang hnenah an hralh chhawng leh mai thin a. Ransa lam ngaina leh an dikna chanvo humhalhtute chuan sorkar tana hna an thawh angin service member pangngai anga ziah luhna tura an nawr chu a hlawhtling dawn ta a ni.

Interior ministry chuan dan siam that a tum mek a, heng ransa an chhawrte hi official status an pe ang a, an chhawr tawh loh hnua neitu thar hnuaia an awm hnuah pawh, anmahni enkawlna hautak tak chhawkna tur pension siamsak an tum ta a ni.

Interior minister Mariusz Kaminski chuan dan hi an la duan mek chauh thu a sawi a, kumin kum tawpa lamah erawh chuan Parliament-in a pawmpui tura an chhawp chhuah theih a beisei tih a sawi.

“An thawh chhungin nunna tam tak an chhan a, mi sual tak tak thahnem tak min mansak bawk a, chawimawina hlan an phu hle a ni,” tiin a sawi.