Dr Ka Zawhna

Doctor Ka Zawhna (August 10, 2014)

Dr. Chawnglungmuana - Aug 09, 2014

Doctor Ka Zawhna (August 10, 2014)

Zawhna: Hnungzang na chhuak, thin bawr vela hnawh deuh tlat hi pum lam ulcer vang ani ang em? Khawsik ruk er er ang ten ka awm tel a, nghawng thate a na tel a, eng damdawi nge ka ei ang? Kum 37 mi ka ni e; ka BP a hniam bawk. Chhanna:  Hnungzang na hi a chhan tam tak chu pum lam fel lo vang ani ngei a, chutih rualin khum dik lo hman vang te, lirthei chuang/khalh nasat vang te, hnungzang ruh lam fel lo vang te pawhin a awm fo tho a ni. Nghawng tha na i sawi tel avang hian nghawng ruh chuktuah fel lo Cervical Spondylosis te pawh i nei tel thei bawk. In fit lo chunga infiamna lam tih chiam, a bikin Badminton khel thin te hian an nei duh hle. Pumpui lawng/pan (Gastritis/Gastric Ulcer) bakah hian Acid Reflux Disease an tih, pumpui acid chawkawng a irh let chho vang te hian hnungzang na a awm thei a, Chawkawng lawng emaw fel lo vang te pawhin a awm thei bawk. Lung lam fel lohna nei te hian an insawisel fo bawk a ni. A dang leh ah chuan mit a lung awm (Gallstone Disease) avang hian hnung na, dar kham te pawh a awm fo mai a, BP hniam i nei tel erawh hnungzang na nen a inkaihhnawih hranpa kher lo thei thung. Kan sawi fo angin a chhan hriat hmasak a tul a, chumi tur chuan Upper GI Endoscopy, Ultrasound leh X-Ray (nghawng leh hnungzang ruh) te i tih phawt a tha a. Pumpui lawng emaw ulcer vang te a nih chuan damdawi hmanga enkawl theih a ni a, Gallstone i neih erawh chuan zai a ngai ang. Khum rualrem lo, dup lutuk ang te hian hnungzang na a thlen fo mai bawk a, mut dan position dik lo te pawhin an nei duh viau bawk.
Share now