Aizawl: Information & Communication Technology (ICT) Department bultumin February 14, 2017 khian Millenium Centre chungzawl-ah pawisa note hmang lova thil lei leh hralh chungchang inhrilhhriatna Digidhan Mela neih a ni dawn. Information and Communication Technology a Chief Informatics Officer Dr. Lalthlamuana hnen atanga Zalen thudawn danin Digidhan Mela/Digidhan Fair-ah hian Mizorama Bank awm zawng zawng 26-te chuan dawr (stall) an hawng vek dawn a, Account nei lote tan awlsam zawka Account hawn theih a nih dawn bakah Pan Card leh Aadhar card pawh a mawhte tan siamsak a ni dawn niin a sawi. Thlamuana chuan, “Sawrkar laipuiin pension, scholarship, gas leh thil dang te direct benefit transfer hmang sum pek tur a tih tawh avangin Account nei lo leh Aadhar Card a ngaih tawh avangin awlsam zawka Account hawn leh mipui hrilhhriat na/zirtirna atan buatsaih a ni,” a ti. Pawisa note hmang lova thil lei leh hralh chu sumdawngte zirtir an ngai nia sawiin Krismas vuakvetah pawh pawisa note a tlem avang leh a note lian ah kir tur an neih thinloh vangin sumdawngte pawh an ihralh tlem nia sawiin hemi tireh tur hian pawisa note hmang lova lei leh hralh dan thiam chu thil pawimawh tak anih thu a sawi bawk. Dr. Lalthlamuana chuan pawisa note hmang lova thillei (cashless payment) chuan nasa takin corruption pawh a tihtlem phah dawn tih a sawi a. Sawrkar kalphung tharah Bank a pawisa lut leh chhuak, nuai 2.5 chin chu enfiah a ngaih vek dawn avangin pan card a pawimawh dawn niin Zalen a hrilh. Sawrkar laipui thupek angin Mizoram sawrkar pawh department leh department indawrna ah chuan March ni 31,2017 hnulam ah chuan cashless payment tur a tih angin hemi atan hian an inbuatsaih mek nia sawiin tih hlawhtlin ngei an tum niin a sawi bawk. Digidhan Mela/Fair hi ruahmanna hmasa ah chuan February ni 17&18,2017 ah neih tum a ni a, mahse sawrkar laipui chuan February ni 14,2017 ah nei tura a rawn hriattir angin a hun hi sawn hma a ni a. He hunah hian Union Minister a tel beisei a ni.