ZALEN May 28, 2026: North Eastern Council (NEC) chuan 15th Finance Commission (2022–26) hun chhungin Mizoram-ah healthcare, zirna, inkalpawhna kawngpui, tourism, agriculture leh mamawh hrang hrangah hmasawnna hna a thawk.

NEC Official press release-in a tarlan danin Schemes of NEC (SoNEC) leh NESIDS-Roads programme hnuaiah Mizoram-ah cheng vaibelchhe 339.06 crore sen a ni.

SoNEC programme hnuaiah hian NEC-in cheng vaibelchhe 123.83 sengin medical leh veterinary, bazar, zirna in, cultural centre, infiamna leh khawtlang mamawh hmasawnna ruhrel sak thar leh thuam that hna a thawk a. Kuthnathawktute tan leilet siam, alu (potato) thar chhuah, vawk leh ar vulh, sangha dil siam, kuhva hmun siam, sapthei sawngbawl leh ranvulh kawnga hmasawnna atan hma nasa takin a la bawk.

Pi leh pute sul hnu, hmun hlui leh Mizo culture humhalhna turin cultural heritage centre, tourism circuit, ecological park leh cultural infrastructure dangte siam a ni a. Heng ruhrel din leh cheithat te hi eco-tourism leh cultural tourism hmasawnna atan pawh tangkai hle tura ngaih a ni.

NESIDS-Roads programme hnuaiah 15th Finance Commission hun chhungin Mizoram-ah cheng vaibelchhe 277.99 man hu road project paruk (6) kalpui a ni a. Chung zinga project pahnih, cheng vaibelchhe 25.19 senna chu zawh fel tawh a ni.

NEC chuan Saiha-Lungbun-Tlangnuam-Haka kawngpui siamthat hna pawh a thawk a. Hei hian Mizoram chhim lam district te leh Myanmar ramri inkara inkalpawhna tha zawk a siam bakah, India Sawrkar Act East Policy tihhlawhtlinna kailawn pawimawh tak a ni.

Ashtalakshmi Youth Exchange Programme hnuaiah India ram hmun hrang hrang atangin zirlai 581 te chuan Northeast-a Zirna In pawimawhte an tlawh a, January 2026 khan Andaman & Nicobar Islands leh Lakshadweep atangin zirlai 44 te chuan Mizoram University an tlawh a ni.

NE-SPARKS (North East Students’ Programme for Awareness, Reach and Knowledge on Space) programme hnuaiah North East State hrang hrang atangin zirlai 786 te chuan Indian Space Research Organisation (ISRO) an tlawh a, an zingah hian Mizoram atangin zirlai 99 (mipa 45 leh hmeichhia 54) an tel an ni.

April 2026-ah khan NEC chuan Sinlung Hills Council area-a khawsak harsa zawk te tan ranvulh tanpuina a pe a, State Veterinary Information and Resource Centre a din a, West Phaileng-ah market building leh Champhai district-a Vangchhia-ah hmasawnna ruhrel din nan sum a pechhuak (release) bawk a ni.

Hei bakah hian NESIDS (Roads) hnuaiah April 2026 khan cheng vaibelchhe 20.09 release a ni a. Hei hi kawngpui sial leh cheithat hna kalpui mek te bakah Pukzing–Silsury kawngpui leh Tualpui–Champhai kawngpui siam hna thawh nana hman tur a ni.