Manchester United-in season chhe tak an hmang mek a, Inrinni zana West Ham an hneh loh kha tun season-a an vawi 13 tlawmna zet a ni ta a, an hneh loh tawh zat atanga chhutin kum 1930 hnua season bul an tan chhiat ber tum a ni mek.

London Stadium-a 2-0-a Hammers an hneh loh chiah khan United hi inelna hrang hranga an khelh hnuhnung vawi sarihah vawi khat chiah hnehna an chang tihna a ni ta a. Premier League-ah pariatna ni mekin Champions League leh League Cup atanga hnawh chhuah an ni tawh.

Krismas hmaa season khata hneh loh an ngah ber tum, 1930 khan league sang berah a mawngphah an ni.

United an kaltluang lo

United hian tun season-a inelna hrang hranga an feh chhuah tawh vawi 26-ah vawi 13 zet an tlawm ta a, season hmasaa vawi 62 an khelha an chak loh zat zet an chak lo der tawh.

Kumin chhungin United hi vawi 20 an tlawm ta a, kum 1989 hnu lama kum khat (calendar year) chhunga an tlawm ber tum an zat ta der a. Kuminah vawi hnih, Aston Villa mikhual tur leh Nottingham Forest tlawh tur an la nei a, an chak loh tam ber kum khum thei dinhmunah an la ding mek.

Tun season Premier League-a vawi 18 an inlan tawhah goal 18 chauh an la thun a, heng zinga pasarihah phei chuan an thun lo.

League sang bera an khelh tawh zawng zawngah vawi 18 khelh thlenga goal 18 aia tlem an thun tum chu 1973-74 (15), 1972-73 (16) leh 1893-94 (15) te chauh a la ni.

Inrinni zana Hammers laka goal an thun theih loh leh hnuah United hian inkhel vawi liah goal an thun ta lo va, November, 1992-a Sir Alex Ferguson-a’n a kaihhruai lai hnu lamah hetiang dinhmun hi an tawng thar leh ta chiah.

Hmel thar nen thlasik bazar...

Sir Jim Ratcliffe-a Ineos Group chuan a tawpa tawpah United-a 25% zet chanpual an lei dawn ta a. Kum 2005-a Glazers chhungkuain an thunun hnuah pawn lam miin hetiang chanvo lian an chan leh hmasak ber a ni.

US-a hmunpui nei sumdawng hausa chhungkua hi a neitu nihna ngah ber an la ni zel a, thutlukna siama vote lak ngaiah chuan thuneihna an la nei tam zawk a; mahse, Ratcliffe-a Ineos Group hian football operation lama thuneihna an nei dawn a, nomawi an lak leh theihna tura kawng dika United hruai kir turin thuneihna an nei dawn.

Chanpual an neih thar tur hi chawlhkar ruk atanga riat inkar velah tihfel a ni dawn chauh thung a, January-a thlasik bazarah hian an tal hman dawn em a hriat rih lo.

February-ah an intihfel hmel chauh va. Kum 18 zet Glazer-in an enkawl chhungin United hian player lei nan Euro tluklehdingawn 2.21 an seng a, tun lai pawisa inthlengna ang chuan £ tluklehdingawn 1.94 a ni a. Kum 18 chhung hian Chelsea (£ tluklehdingawn 2.7) leh Manchester City (£ tluklehdingawn 2.33) tih lohva Europe-a inseng nasa ber an ni.

Glazer chhungkua hian an sumdawnna lamah sum an hmuh that avangin January-ah hian bazarna tur sum an nei dawn sa hrim hrim.

Hetih lai hian January hi bazar a harsa ziah a, Erik ten Hag-a tan pawh a budget mil si, a team-a danglamna thlen thei tur lak tur a dap a ngai dawn.

Thlasik bazar hnuhnung berah khan goalkeeper Jack Butland, midfielder Marcel Sabitzer leh striker Wout Weghorst te a hawh chhuak a. September-a bazar hun ni tawpah defender Sergio Reguilon leh midfielder Sofyan Amrabat te a hawh bawk.

United hian pawisa nei mah se thla thar bazarah an inlei chiam tawh lo tih an lo sawi tawh a, inlei belh ai chuan Jadon Sancho-a hma hun tihchian dan turin ngaihven a hlawh zawk a. Kum 23 mi hi a hlawh a sang si a, a then chhawk zangkhai nan mi hnena an hawhtir a rinawm.

Erik ten Hag-a hma hun

Khelmualah United tal buai mah manager Ten Hag-a dinhmun a derthawn thu hi sawi a la ni ngai lo.

Mahse, November thlaah manager of the month-te pawh ni ve mah se Dutch coach hian a naute a kaltluanpui hleithei lo va, Champions League leh League Cup-a an tlak tawh bakah Premier League-ah hmahruaitu Arsenal chu point 12 zetin an phak lo mek a, point riatin a sang palia mite an phak lo bawk.

United hian an hmabak pathumah palina huanga awm pahnih, Aston Villa leh Tottenham an su tel dawn a, heta an result hian a sang paliah an tel dawn em tih a hril thui thei dawn hle a ni.

A pawimawh berah chuan Dutchman hian bazar hun vawi thum a hman tawhah £ maktaduai 400 dawn a hmang tawh si a, a insen zat mil result a chhawp chhuah a ngai a ni.