ZALEN Oct. 13, 2025 : Tukin khan MIMA Gen. Hqrs. office-ah MIMA chuan Emergency Executive Meeting MIMA office-ah ko a. Hetah hian tuna 1st International Star Expo lammuala neih mek chungchang sawiho a ni a, he Expo-ah a buatsaihtute hian dan leh dun an ngaipawimawh lo leh advertisement an tar ang hian an kalpui lo hle nia hriain heng a hnuaia mi ang hian thu pass a ni. 

1. Central Consumer Protection Act 2019 Section 89-in a sawi angin he Expo hian advertisement-ah leh banner-a an tar angin '1st International Star Expo' tiin tar ani a, hei hi Central Consumer Act 2019, Section 89 bawhchhiain misleading/false advertisement a ni a. Hei hi danin hremna a phut chu nuai tam tak chawi leh kum tam tak Jail tan theihna a ni. 

2. Food Safety Licence nei loin Delhi Kitchen tih hmangin ei leh in siam a ni a. He license hi ni 20.02.2021 a thi tawh a niin, kum 4 lai a thi tawh a ni. Hei pawh hi FSSAI dan kalh tlat ani. 

3. ILP an neih dan MZP leh MIMA ten ni 10.10.2025 khan he Expo hi a lo check tawh bawk a, he miah hian invalid ILP 36 lai man an ni a, police ah pek an ni.

Hetianga dan bawhchhia a vawiin ni thlenga 1st International Star Expo Lammuala buatsaih hi tih tawp a la nih loh avangin MIMA leh MZP te chuan an ngaithiam lo hle a, heti chunga he expo hi hawn zel anih a, buaina emaw harsatna emaw an tawk anih pawhin MIMA leh MZP chuan mawh an phur lo vang.

Chuvangin he expo hi a rang lama ti tawp tura ngenna Aizawl DC leh OC Aizawl Police Stationah MIMA hruaitute chuan lehkha vawiin khan an thehlut nghal a ni. Thuneitu te hian a rang lama he expo hi ti tawp turin MIMA chuan thuneitute a ngen nghal a ni.