.Aizawl: Mizoram police chhinchhiah danin khawchhak lama Mizo thalai inhlawha chhuak chu mi 2000 chuang an tling tawh a, ram danga hnathawh hi a him tawk lo hle niin an sawi. Zalen palaiin a kawmna ah Police hotu te chuan Mizo thalaite hi Singapore, China, Macau, Hongkong, Dubai leh Kyrgystan ah te mi engemaw zat hnathawkin an chhuak a, heng zinga a tam ber hi Singapore ah an thawk a, a tlangpuiin mi awmpui (house maid) an ni tih an sawi. Mizoram Police-ten tun hnaia thuchhuah an siamah ram danga hnathawk tura thawn chhuak thei registered placement agency an la awm lo tih sawiin agent nia insawiten thiam tak leh kal châkawm tak anga sawiin mi tam tak an bum a, hnathawka chhuak zingah harsatna tawk an awmin buaipui kawngah harsatna a awm thin niin an sawi. Police hotute chuan mi thenkhat document lem hmanga Myanmar passport hmanga kal thin an awm nia sawiin heng mite hian harsatna an tawh pawhin inbuaipui theih a ni lo a, a chhe ber pawh thleng se an ruang lak a buaithlak a. Chuvangin, hnathawka an kal dawn a nih pawhin India passport chauh hmang se an duh tih an sawi. Hnathawka chhuakte hian an kalna sensote an rulh leh a ngaih avangin haw leh mai pawh duh nise an haw mai thei thin lo a, anmahni leh an chhungte phurrit an siamsak thin niin an sawi bawk. Police chhinchhiah danin ram pawna hnathawka thawn thin agent hi 22 an chhinchhiah mek a, heng bakah hian mi thenkhat thawn an awm thin niin an sawi a. Agent mai bakah hian Singapore-a lo awm tawh mi thenkhatten tute nen emaw inbepawpin hnathawk tur hi an thawn thin niin an sawi a. Ramdanga hnathawk tura kal te hi a tlangpuiin lehkha zir sang lote an nih avangin harsatna an tawh pawhin inbuaipui a harsa bik niin Police thawktute chuan an sawi a. Zokhawthar-a duty police-te pawh fimkhur turin an hriattir thin Zalen an hrilh bawk. Ram pawna hnathawk zingah mipat hmeichhiatna lama humsual dai an awm an la hriat loh thu sawiin India ram chhungah erawh chuan an awm tih Police hotute chuan Zalen an hrilh a. Heng mite hi placement agency kaltlang ni lem lo, anmahni thua hnathawka chhuakte anni tlangpui niin an sawi bawk. &&&&&&