ZALEN June 23, 2026: Mizo Zirlai Pawl chuan vawiin khan Aizawl Press Club-ah chanchinthar lakhawmtute an kawm a, Mizoram-a Special Intensive Revision (SIR) neih meka SIR-in a base 2005 E-Roll leh roll thar ber E-Roll 2024 an khaikhin atangin Chakma khua bikah vote punna a sang lutuk leh 2005 E-Roll-a khaw awm lo khaw 97 a awm thar an ti a, India leh Bangladesh-a vote nei kawp an hmuchhuah thu an sawi bawk.

MZP chuan Special Intensive Revision felfai taka kalpui a nih theihna turin tun hma atanga Foreigner pun chakna thin Constituency a khuate an enfiah a, Chakma khua bikah vote percent punna a san piah lamah khaw 97 laiin a pun belh a thu an sawi a.

India leh Bangladesh khua leh tui nihna nei kawpte an hmuchhuah bakah E-Roll a House number awm lo pawh hmuh chhuah anih thu press conference-ah hian an sawi bawk.

Hemi chungchang hi Chief Electoral Officer (CEO) hnenah complaint thehluh an tum a, Complaint an thehluh turah hian khaw 195 te chu SIR kalpui mekah en uluk leh zual turin a ngen nghal a, heng khaw 195-ah hian SIR hi kalpui a nih tawh pawhin, DEO te nen ngei ennawn leh turin MZP chuan an ngen a, He hmalaknaah hian MZP chuan a tul anga theuneitute thawhpui an inhuam reng thu an sawi.

MZP chuan Bangladesh atanga Chakma Foreigner rawn lut, India khua leh tui nihna neilo Electoral Roll-a at lut thih leh voters an pun chak lutuk avangin 1995 December-a Electoral Roll Intensive Revision neih tum pawh khan Electoral Roll Officer leh a hnathawktute enpuiin Mizoram-ah an lo fehchhuah tawh a.

Hemi tum hian Chakma Foreigner sing chuang roll atangin paih an ni a, Tlabung Constituency-ah phei chuan voter 4,000 chuang paih an ni. 1996 khan Chakma foreigner te Mizoram chhuahsan tura nawrna Long March pawh an lo kalpui tawh tih an sawi bawk.