Aizawl: Kum 2011 atanga March 2015 thla thlengin Mizoram police te chuan pawngsual case 411 an ziak lut a, case ziah luh loh thahnem tham tak pawngsual hi a thleng nia thu dawn a ni. Mizoram Police - CID (Crime) hotute hnen atanga thudawn danin 2011 atanga kumin March thla thleng khan pawngsual avang hian mi 445 man an ni tawh a, kumtlinglo pawngusal tawk 262 awmin, kumtling pawngsual 149 an awm a, pawngsual rawn vawi 14 a thleng nia thudawn a ni. Naupang khuaikhem chungchang buaipui thintute chuan Police ten case an ziah luh bakah hian ngaihdam indil avanga ngawih bopui thahnem tham tak pawngsual a thlen thu an sawi a, Aizawl khawpui chhung leh Mizoram khaw hrang hrangah naupang kumtlinglo an chenpuiten an pawngsual a tam hle niin an sawi. Aizawl hmar lam veng pakhata cheng, a naupan laia an laina hnai takin a khawih chhiat nu pakhat chuan tun thlenga pawngsual a tawh avangin hlauhna a la neih nasat thu a sawi a, “Zan ka mute hi mang chhe pui pui ka mang thin a, pasal fanau nei tawh ka ni a, ka awm dan hi sawi chhuah vek a rem si lo a, ngawi rengin ka tuar tlawk tlawk mai a ni,” a ti. Pawngsual tawk tu nu pakhat chuan, pawngsual tawk te chu an nun a khawloh phah vek loh thu sawiin, a chhungten counselling mumal tak an pek avangin nunphung pangngaia a nun theih phah thu a sawi a. Kumtlinglo pawngsual tawkte chu an chhungten an tawrh rapthlakzia hriain buaipui se a duh thu a sawi bawk. Naupang khuaikhem chungchang buaipui thinte chuan pawngsual tawk tam takte chu an nun a khawloh phah vek loh thu sawiin, “Thenkhat chu pawngsual an tawk tih pawh hriat loh an nih laiin thenkhat erawh chu vawi tam tak sual hlawhtlin an nih avangin sex chu an addict a, kum naupang tein sawnte an pai a, inzuara ruihhlo a tlan ta tam tak an awm a ni,” an ti. Hun rei tak chhung naupang khuaikhem chungchanga inzirtirna lo pe tawh tu V.Vanlalruati chuan, mite endan tur ngaihtuah avanga ngawihbo pui mi tam tak an awm thu a sawi a, “Naupang khuaikhem chingte hi insiam rem pui mai lovin, an thiltih pawizia an hriat chian ngei theih nan Dan hmanga an chung thu reltir ngei hi a tul a ni,” a ti. V.Vanlalruati chuan naupang khuaikhem tawk ten counselling tha tak dawng ngei se a duh thu sawiin, “Anmahni enkawl turte pawn an enkawl leh kaihhruaina dan turah mi thiam zawk rawn hreh lo se ka duh hle a ni,” a ti. Thu dawn danin Aizawl khawpui chhung veng hrang hrangah hian ngawih bopui tak avanga mi hriat loh pawngsual thleng tam tak a awm a. Naupang khuaikhemtute hi mi hrang ni loin an laina hnaite an ni tlangpui a, thenkhat phei chu sakhaw rawngbawltu zahawm tak takte an ni a, pawngsual tawktu chhungte nena insawirem avanga ngawih bopui a ni hlawm a ni. Thudawn danin revival speaker thenkhatte ngei pawhin an rawngbawlna hmunah naupang kumtlinglo emaw, nula puitling tawh emaw suala buaipui ta hrepte a awm a. Veng thenkhata naupang khuaikhem tute chu kohhran rawngbawltu nia mite pawn an awih lo pawngsual nia an ngaih theih loh avanga police hnena report loh a kohhran hruaitute ngenna anga insawi rem tak pawh a awm nual nia thudawn a ni. Kumtlinglo pawngsual chungchangah hian hmeichhia te chauh ni lo, mipa kum naupang tete te pawh an awm niin an sawi a, heng zingah hian thalai pawla mi in hmang tak tak te pawh an awm ni a thudawn a ni bawk.