Aizawl: Kum 2016 chhunga Mizoram mipui thihna thlentu tam ber chu pum lam thalo a ni a, hei hi thihna zawng zawng atanga chhutin 17.1% a tling. Directorate of Economics & Statistics Department in nikum 2016 chhunga Doctor ten mitthi te thihdan an chhinchhiahna 'Medical Certification of Cause of Death (MCCD)' tarlan danin pum thalo vanga thi hi mi 465 awmin hei hi mitthi chhinchhiah atanga chhutin 17.1% a tling a. Natna hrik vanga thihna chuan dawtin thawk lam harsatna, thizen zam thalo leh cancer ten an dawt a ni. Nikum chhunga sawrkar leh mimal damdawiin hrang hrang 100 ten an chhinchiah danin mitthi hi 2704 awmin heng zinga 1824 chu mipa an ni a, hmeichhia 880 thi an awm bawk. Thihna tam ber kawchhung lam thalo zingah hian thin thalo, pumpui na, ril leh chaw kawng na te an tam ber a, heng zingah hian thin thalo tam berin thihna thlentu zinga 13% a hauh pha hial a ni. Natna hrik vanga thihna zingah hian HIV, septicemia leh malaria te chu a lar zualte an ni. Zalen zawhna chhangin Senior Medicine Doctor pakhat chuan thin thalo an tam chhan chu zu hnathawh vanga thin ro leh hepatitis vang ni bera a hriat thu a sawi a. Mizote chu zu in kan thiam lo a, hmuh changa in vak mai thin kan nih avangin thin in nasa takin a tuar thin niin a sawi. Pum thalo an tam chhan pawh ei leh in kan uluk tawkloh vang niin a sawi a. "Thil uih leh chi hrang hrang, pum ngeihloh chi kan ei hnem lutuk hi kan chhiatpui niin ka hria," a ti bawk.