Aizawl; Mizoram District 8 khawpui leh RD Block zawng zawngte chu kum 2016 tawplam ah chuan Internet hmanga thlunzawm vek tum a ni a, tunlai hian M/S Railtel Corporation of India Ltd. chuan ngawrh takin hna an thawk mek. ICT Department thawktute hnen atanga Zalen thudawn danin District khawpui te leh RD Block thlunzawm hna thawk tur hian January ni 16,2012 khan Ministry of Telecommunication & Information Technology hnuaia Department of Telecommunication leh M/S Raitel Corporation Ltd. te chuan inremna an ziak a. District khawpui leh RD Block te hi a kual (ring topology) hmangin an thlunzawm vek dawn a, line lehlam a chah palh pawha lehlam line hmanga nung reng thei turin line hi siam a ni ang. Hriat theih chinah Railtel hian Km 184 a thuiah hrui an phum tawh a, 2015 December-ah chuan Km 412-a thui phum hman an tum a ni. District khawpui leh RD Block bakah Mizoram chhunga khaw thlanbik 645 te chu National Optical Fibre Network (NOFN) hmanga thlunzawm tum a ni bawk a, he hna thawk tur hian M/S Railtel Corporation of India Ltd. thlan an ni. Railtel hian tender thenkhat tichhuak tawhin hna tan thuai an tum bawk a ni. Ruahman dan chuan NOFN hnuaiah hian hrui (fibre) phumna tur Km 3167 laih tum a ni a, khua zawng zawngte chu 100 MB a chak internet hmangathlunzawm vek tum a ni. ICT thawktute chuan Company ten hna an thawh mekah kawngpui laihchhiat a tul thin avangin harsatna an tawk a, hei vang hian duh angin hnathawh chak a har tih Zalen an hrilh a. Kawng enkawltu Mizoram PWD nen chuan inremna an siam tawh tih sawiin Border Roads Organisation lam atanga laih phalna an la hmuh mai theihloh vangin buaina tenau an nei tih an sawi a, mah sec hinfel thuai anih an beisei tih an sawi bawk. %%%%%%%%%%