Aizawl: Nikum 2017 chhung khan Mizoramah naupiang 21431 awmin thi 6191 an awm bawk a. Nikum 2017 kha kum 10 kalta chhunga Mizoramah naupiang an tlem ber kum a ni. Directorate of Economics & Statistics department in tunhnaia ‘Annual Report of Registration of Births & Deaths’ an tihchhuah taka tarlan danin nikum chhung khan naupang thi (infant death) 372 awmin nau thisaa piang 131 an awm bawk a, birth rate hi 19.53 niin hei hi kum 2008 atanga chhutin kum khata naupiang tlem ber kum a ni. Report tarlan danin sex ratio atanga chhutin mipa 1000 zelah hmeichhia 985.63 piang anga chhut a ni bawk. Mizoram district 8 zingah Siaha, Lunglei leh Lawngtlai district-ah te mipa aiin hmechhe piang an tam zawk a, district dangah te hian mipa piang an tam zawk a ni. Saihaah hian mipa 1000 zelah hmeichhia 1340.24 piang ang an ni a, Lawngtlaiah hian mipa 1000 zelah hmeichhia 1021.27 leh Lunlei ah mipa 1000 zelah hmeichhia 1048.12 piang anga chhut a ni. Mizoram district 8 zingah Aizawl district-ah naupiang tam berin 8685 an piang a, Serchhip district-ah tlem berin naupiang 693 an awm. Nikum chhunga thihna thlengah pawh Aizawl district-ah thi tam berin mi 2960 an thi a, Mamit district-ah thi tlem berin mi 254 an thi nia chhinchhiah a ni. Thi zingah hian mipa chu an tam zawk fe a, thi 6191 chhinchhiah zinga 4020 hi mipa an ni a, 2127 chu hmeichhia an ni thung. Nikum chhunga thi zinga 39 te hi Mizoram pawna thi an ni. Kum 2011 chhiar-puiah khan Mizoram ah mihring 1097206 an awm a, heng zinga a tam zawk 571771 hi khawpui (urban) a cheng an niin a dang 525435 hi thingtlang (rural) a cheng te an ni a. Economics & Statistics department chuan naupiang leh thi chhinchhiahtu ‘Register of Births & Deaths’ hi 843 neiin heng mite hian uluk leh dik thei ang berin piang leh thi hi an chhinchhiah thin niin department thawktute chuan Zalen palai an hrilh. Chhinchhiahna tarlan danin kum 2008 khan Mizoramah nau piang 23294 awmin thi 5587 an awm a, 2009-ah piang 25535 awmin thi 5942 an awm a, 2010-ah piang 25752 awmin thi 5365 an awm leh a. Kum 2011 khan piang 25425 awmin thi 5484 an awm a, 2012-ah piang 26042 awmin thi 6503 an awm a, 2013-ah piang 24584 awmin thi 6126, 2014-ah piang 24516 awmin thi 6444 an awm a, 2015-ah piang 24786 awmin thi 6440 an awm a, 2016-ah piang 22497 awmin thi 6422 an awm leh a, nikum 2017 khan naupiang 21431 awmin thi 6191 an awm bawk a ni. Kum 2017 chhunga Mizoram district hrang hranga naupiang leh thi zat District                  Piang                 Thi Aizawl                   8685                  2960 Champhai            1787                   658 Kolasib                 1583                   473 Lawngtlai             2375                  442 Lunglei                 3107                    813 Mamit                  1605                   254 Saiha                    1596                   276 Serchhip             693                     315 Total                     21431                 6191