Aizawl: Aizawl khawpui bawlhhlawh sawngbawlna hmun tur New Engineered Sanitary Landfill siam hna thawh mek a ni a, he hna hi zawh anih hun chuan hmundangah bawlhhlawh paih phal a ni dawn lova, tuna Aizawl khawpui bawlhhlawh paihna Tuirial dumping ground pawh kum 2018 ah chuan thenfai a, khar nghal tum a ni. Mizoram State Sanitation Task Force chu Zirtawpni khan UD&PA Secretary Dr. Vanlalramsanga hovin an thukhawm a, bawlhhlawh paihna changkang leh changtlung zawk siam tura hmalak mek chungchang an sawiho. Er. Valbuanga, Program Director, SIPMIU chuan bawlhhlawh te thianghlim taka sawngbawlna hmun tur New Engineered Sanitary Landfill chu chak taka hnathawh kalpui mek anih thu hrilhfiahin, Aizawl khawpuia in tinah bawlhhlawh te hi a tawihthei leh tawihtheilo a thliarhranna tur chhungkaw 71438 hnenah Dustbin pahnih theuh sem a nih tawh thu leh Awareness pawh February 2016 khan zawhfel anih tawh thu a sawi a. Hemi bawhzuina tur hian November thla atangin House to House campaign neih tan nghal ani leh mek a ni tih sawi bawkin, bawlhhlawh thliarhran sa te lakkhawmna tur Colour coded Garbage Vehicle (407 LPK Truck) 54 nos. pawh kum 2017 chhunga hman theih turin Contracter pawh letter of Acceptance neih tawh anih thu leh bawlhhlawh te thianghlim taka sawngbawlna tur hmun New Engineered Sanitary Landfill contract Agreement pawh July ni 1, 2016 khan sign anih thu a sawi. New Engineered Sanitary Landfill-ah hian bawlhhlawh tawihthei atanga leitha siamna hmun nitin ton 22 sawngbawlna Vermi Compost Plant leh nitin ton 50 sawngbawlna Mechanical Compost Plant hna hi thawh mek a ni a. Bawlhhlawh tawihtheilo te nitin ton 74 sawngbawlna hmun Dry Waste Resource Centre pahnih Aizawl tlak lam Industrial Growth Centre-ah siam mek a ni.