Aizawl: Nimin khan Panchayat Mahila Shakti Abhiyan (PMSA) chuan Aizawl Press Club-ah thuthar lakhawmtute kawmin nakum Assembly inthlanpuiah hmeichhiaten 33% seat reservation an neih theih nan political party tinah ngenna an thehluh thu an sawi a, an hmalakna thenkhat an tar lang bawk. PMSA President Zothankimi chuan ram hmasawn nan hmeichhiate an pawimawh tih sawiin, “Mipa ringawt changkang lovin hmeichhia pawh an changkan tel ve a ngai a, thil dangah chuan hma sawn mah ila, politics-a hmeichhiaten hma an sawn hi a pawimawh,” a ti. PMSA hotute chuan state-a political party-te an inlungrual chuan AMC angin hmeichhe bial a siam theih tih an hriat thu an sawi a, 33% seat chu hmeichhia te tana dah turin political party tinah ngenna an siam tih sawiin chhanna an nghah mek thu an sawi bawk. Panchayat Mahila Shakti Abhiyan hotute chuan an hmalak tawhna sawiin Local Council leh Village Council-ah Women Reservation an lo dil tawh a, a hlawhtlinna pawh an hmu tawh tih an sawi a. Autonomous District Council-ah pawh MDC inthlan apiangin a tam thei ang ber hmeichhe candidate dah turin Party hruaitute hnenah ngenna an pek ziah thu leh hei hi tawk an tih loh avangin Women Seat Reservation pawh an dil zel dawn thu an sawi. PMSA Adviser Prof. Lalneihzovi chuan hmeichhia te chu thingpui lumtu, parthi awrtir tur leh mipate thusawi laia a hnunga lo ding ringawt atan ni lovin tangkai takin mipate angin an thawk ve thei tho tih a sawi a. PMSA tum ber chu hmeichhiate politics-a hmasawnna neihtir a nih thu sawiin an tum chhan pawh hmeichhiate hmasawnna chu ram hmasawnna a nih vang niin a sawi. AMC, Local Council, Village Council leh tuna an dil mek MLA-ah pawh candidate atan hun lo kal zel tura politics tihmasawn thei tur leh tih tak zeta khawtlang, ram leh hnam tana inpe thei tur hmeichhe candidate thlang chhuak thiam turin political party tin an ngen niin an sawi bawk. Panchayat Mahila Shakti Abhiyan hi Ministry of Panchayati Raj hnuaiah politics a hmeichhiate dinhmun chawikan nan state hrang hrangah din a ni a, Mizoram bik hi 2011-ah din niin PMSA Core Committee-ah hian Zothankimi chu President ni lai mek a ni a. Tuna AMC a Ward 19 zinga 6 hmeichhe bial atana dah pawh hi PMSA hmalakna a nih thu an sawi bawk.