Aizawl; Mizoram sawrkara education department chuan kum 2019-2023 chhungin zirtirtu (SEDP teacher telin) 3,163 a la tawh a. Myanmar atanga Zohnahthlak raltlan naupang 6,000 chuangte zirna mumal tak a pe mek bawk.

Mizoram Legislative Assembly Budget Session neih mekah, February 22, 2023 a a demand sawihona hmawr a bawknaah Education Minister Lalchhandama Ralte chuan kum 2019 atanga 2023 chhungin primary school zirtirtu (regular) 94, middle school zirtirtu (regular) 58, a vaiin mi 152 lak an nih tawh thu a sawi.

Hengte bakah hian muster roll (MR) teacher primary school zirtirtu 817 leh middle school zirtirtu 63, a vaiin mi 880 lak an nih thu tar lang bawkin, Centrally Sponsored Scheme (CSS) hnuai Samagra-ah primary school zirtirtu 107, middle school (UPS) 130, high school 159, higher secondary school zirtirtu 208 leh hindi zirtirtu 826, a vaiin CSS hnuaiah zirtirtu mi 1,430 lak an nih tawh thu a sawi. 

Education minister sawi danin SEDP teacher mi 701-te nen zirtirtu an lak tawh zawng zawng chu mi 3,163 an ni.

Education minister chuan Myanmar raltlan naupang 6,000 chuang zirna mumal tak pek an ni tih sawi bawkin, uniform leh text book bakah mid day meal thlenga pek an nih thu te, Bangladesh atanga Zohnahthlak Mizorama raltlante pawh academic session thar atangin Mizoram khua leh tui ang thlapin zirna mumal tak pek an nih dawn thu a sawi.