Aizawl December 3, 2023 : Mizoram police chuan kum 2019 atanga kumin 2023 thlengin silai leh a mu (Ammunition) man chungchang ah thubuai ziahluh 83 neiin, mi 119 man an nei.

Home department in tunhnaia an tihchhuah Achievement Report (2018-2023) a tarlan a nih danin, kum 2019 ah dan lo a silai leh a mu kawl/tawlh thubuai 15 ziahluh a awm a, mi 18 man an nei a, kum 2020 ah thubuai 6 ziahluh neiin, mi 10 man an nei.

Kum 2021 ah thubuai 18 ziahluh nei bawkin, mi 27 man an nei a, kum 2021 ah thubuai 28 ziahluh awmin, mi man 38 an awm. Kumin kum kal mek 2023 ah thubuai 16 ziahluh nei leh tawhin mi man 26 an nei.

Kum 2019 a silai chi hrang hrang an man te chu a vaiin 27 a tling a, 2020 ah silai chi hrang hrang 42 zet man an nei.

Kum 2021 ah silai chi hrang hrang 68 man neiin, 2022 ah silai chi hrang hrang 81 man nei bawkin, 2023 ah 29 man an nei leh tawh bawk.

Kum 2019 atanga kumin 2023 thleng a silai an man zingah hian tualchher silai man a awm nual a, an man dangte chu AK56 Rifle te, .22 Caliber AK Rifle te bakah, .303 Rifle (Made in China) te leh silai chi hrang hrangte an ni.