Aizawl: April 31, 2019-ah chuan zirtirtu train-te chauhin zirtirtu hna an thawk thei tawh dawn a. Zirtirtu la train lo zawng zawng te training neihna turin State Council of Educational Research & Training (SCERT) chuan hma a la mek. Zirtirtu la train loh zawng zawngten training an neih theih nan National Institute of Open Schooling chuan training a buatsaih dawn a, hemi atan hian zirtirtu train lo zawng zawngte chu September 15, 2017 hmain an in register vek tur a ni a. Zirtirtute in-register nan hian tih fel ngai a awm nual tih sawiin SCERT hotute chuan an buaipui mek thu Zalen an hrilh. Training hi online-a neih a nih dawn thu sawiin NCERT hotute chuan face to face programme ‘contact programme’ pawh an nei tel dawn niin an sawi bawk. Central lam atanga thu lo thleng leh Right to Education Act in thu a pek angin zirtirtu la train lo zawng zawng te chuan zirtirtu hna an thawh zel dawn chuan zirtirtu training an paltlang ngei a ngai tawh dawn a, hei hian school zawng zawng private school chenin a huam dawn a ni. Zirtirtu training la nei lo zawng zawngten training an neih theih nan hian SCERT chuan hna an thawh mek thu Zalen an hrilh.