Aizawl: Kilometer 51.30 a thui Bairabi-Sairang relkawng chu December 2022-ah chuan peih hman tum a ni.

Zalen palai zawhna chhangin Consultant, Railway Hrangtawna chuan tunah hian hna tam zawk chu thawh zawh tawh a ni tih a sawi a. Ram lak (land acquisition) ngai 481.18 hectare turah 427 ha lak a ni tawhin 89% zawh a ni tawh a, June 2020 ah tihfel vek tum a ni tih a sawi. An hmachhawp sawiin a laih hna (earth work) ah 84%, minor bridge ah 72%, major bridge ah 45%, leiverh (tunnel) ah 88% leh tunnel lining ah 75% te zawh a ni tawh tih sawiin December 2022 a hna zawh an tum a ni.

Bairabi leh Sairang inkar rel kawng hi 51.38 km a thui niin, Station pali - Hortoki, Kawnpui, Mualkhang leh Sairangah te a awm dawn a. Hna hi kum 2008-09 khan tan niin sum senso tura ruahman chu vaibelchhe 5021.45 a ni a, kumin January thla thleng khan Rs. 3265.03 crore hman tawh a ni.

Bairabi-Sairang bakah hian km 223 a thui Sairang to Hmawngbuchhuah te, km 43.15 a thui Pathankandi to Kanhmun leh km 20 a thui Lala Bazar to Vairengte siamna tur survey pawh peih niin a siamna tur sum pekchhuah a la ni lo thung.