Hripui leng vangin football fans tam takin stadium chhung lutin a hmunah an club tan te football khel lai an en thei lo va. Chutih rualin, fans ruhkawl thahnem tak erawh chuan TV kaltlangin mahni living room atanga an club tan te khel chu an en tho a, en mai duh tawk lovin club ten an sum hmuh ve na ber pakhat an jersey lei pawh an thulh chuang lo. 

Kum dang ang em chuan football club te hian an jersey te hralh chhuak tam lo mah se club lian tam tak te chuan an mamawh tam tak phuhruk tur khawp chu an hral thung.

European club lian a bik takin league lian panga a club te hian an jersey te chu an hralh ve nual hlawm a, khawvel pumin an league inkhel zawng zawng hmu lo mahse, Champions League khel phak te erawh an lar hle thung. 

Nikum chhunga  jersey hralh tam ber ber football club 5 te chu:

#5 Juventus (Adidas): 

Serie A club hlun leh lian Juventus hian jersey mtd 1.42 zet nikum chhung khan hralh chhuakin jersey hralh tam lama panga-na an ni. Turin atangin jersey mtd 1.42 zet an hralh avang hian, Italy club zinga club lar ber ti pawhin sawi ila kan sawi sual awm lo ve. Binconeri hian khawvel player huhang ngah ber Cristiano Ronaldo chu August thla thleng an kawl a, a ni vang hian he dinhmun hi an thleng pawh a tih theih awm e.

#4 Manchester United (Adidas): 

Premier League club Manchester United hi khawvel-a fans ngah ber club nia sawi thin an ni. United hian 2021 chhung khan jersey mtd 1.95 zet hralhin jersey hralh tam lamah pali-na an hauh.

Khawvel football club lar ber pawl Manchester United hi nikum season khan Premier League-ah pahnihna an ni a, competition dangah cup chawi an nei lo bawk. Club lar tak ni chungin khelmual lama an chet fuh tawk loh vangin an dinhmun a sang tawk lo a ngaih a ni. Hetih lai hian Social Media lama zuitu ngah Cristiano Ronaldo chuan nipui transfer-ah United hi zawmin a jersey hak thin no.7 a rawn ha leh chat bawk a, hei hian a pui hle awm e. 

#3 Liverpool (Nike): 

Tun hnaia chhova khelmual chhunga che tha thei tak Liverpool fans te chu an phur hle a, an hmelma hlun Manchester United chung zela an awm ngar ngar theih vangin an club fans te an phur a, an kawr pawh hralh a kal hle a ni. Thla 12 chhungin kawr mtd 2.45 zet hralh hmanin jersey hralh tam lamah pathumna an ni. Kum 2020 khan Premier League title an chawi khan fans teah phurna nasa tak a tuh ngei niin a lang. 

Mahse, Liverpool hian mual chhung lama an mahni aia chetha thei zawk Manchester City an phak hlei thei lo va, season liam tak khan an nomawi kawl pawh chhuh sakin kumin pawh hian table en chuan an phak leh dawn lo a ang khawp mai. 

#2 Real Madrid (Adidas): 

Footbaler kei ka ni inti chin tena khelh ngei an tum thinna club lar leh ropui Real Madrid chuan nikum chhung khan jersey mtd 3.05 zet hralhin kawr hralh chhuak tam pahnihna an ni.   

Liverpool dungthulin Real Madrid pawh hian season liam ta khan trophy an chawi bik lo. Chuti chung chuan an kawr mtd 3.05 zet an hralh phak tho a ni. An kawr hralh tam ber pakhat an captain Sergio Ramos chu Paris Saint-Germain lamah an hralh zui bawk a, chuti chung chuan pahnihna an la ni phak a ni.         Nikum lamah cup chawilo mahse, tun season-ah chuan Real Madrid hian Spanish Super Cup chu an chawi der tawh a, La Liga lamah hmahruaitu niin Champions League lamah Round of 16 an lut a, Copa del Rey-ah quarter-final an lut tawh bawk. Hetianga an chetha a nih chuan nikum lam ai chuan jersey hralh lamah pawh hma an sawn leh ngei tura beisei an ni.

#1 Bayern Munich (Adidas): 

German club ropui hian jersey mtd 3.25 zet hralhin pakhatna an hauh. An kawr hi Adidas lam siam niin nikum season chhng khan mualchhungah an chetha hle a, chu an chetthat chu mual pawn lamah an chhunzawm zui ta zel a ni.        

Bayern Munich super star striker Robert Lewandowski hian boruak a nei lian hle a, amah mimal hian fans tam tak neiin jersey hralh kawngah pawh hian nasa takin a pui ngei ang. A thiam leh goal a thun theih em vangin mi tan a hlawh a, 2020 ballon d’or award dawng ngei tura ngaih a nih laiin hrileng vangin  award hi sem chhuah a ni lo. Hei vang hian khawngaih leh lainattu a ngah phah hle bawk. Polish striker hi 2021 FIFA World best player a thlan a ni ta tho a ni.