November 21, 2022 khian World Cup khuh-hawn nan Al Khor mualah tournament thlengtu ram Qatar chuan Ecuador an hmachhawn dawn a, group stage match dang khelh hun leh hmun tur erawh siam fel a la ni chiah lo thung. 
   

Team tha pahnih World Cup  Champion lai France leh England te hi an chak chho zel a nih chuan quarter-final-ah an inhmachhawn a ngai dawn. Kum 2018 World Cup champion France hi Group D-ah awmin Denmark, Tunisia leh Intercontinental play-off khel tur team pathum United Arab Emirates, Australia emaw Peru te atangin pakhat an lut chho leh bawk ang.
   

Team tha leh huhang ngah ram pahnih kum 2010 champion Spain leh kum 2014 champion Germany te chu Group E lamah an awm ho a, anni ram pahnih bakah hian Japan bakah Intercontinental play-off khel tur team hnih Costa Rica leh New Zealand te atangin pakhat an lut chho bawk ang. 
   

Tum 4 champion nomawi chawi tawh Brazil chu 2018-a group khata an awm awmpui Switzerland leh Serbia te nen an awmho leh a, anni bakah hian Cameroon an awm bawk. Selecao hmelma Argentina te chu Saudi Arabia, Mexico leh Poland te nen group C lamah an awm ho thung.
   

World Cup-a inlan tur Coach zinga lar ber pawl Louis van Gaal chuan Netherlands a enkawl dawn a, Group A lamah a thlengtu ram Qatar leh Ecuador bakah Africa Cup of Nations champion Senegal te nen an awm ho bawk ang.
   

Cristiano Ronaldo leh a pawl te Portugal chuan Uruguay, Canada leh South Korea an awmpui dawn a, world raking-a pahnihna lama tla thla hlim Belgium team hian Ghana, Morocco leh Croatia te an awm pui bawk ang.
Khawi hmunah nge, eng tik hunah nge 2022 World Cup an khelh dawn?
   

2022 World Cup hi ram lum Qatar-in an tlen dawn avangin nipui laia khel lovin, thlasikah khelh a ni dawn a. Tournament hi November ni 21 Thawhtanniah Al Khor khawpui, Al Bayt stadium-ah khuhhawnna neih a ni ang. Final chu Doha hmuna Lusail Stadium-ah Christmas hma kar December ni 18 Pathianniah khelh a ni thung ang.
   

2022 World Cup-ah hian ram 32 telin group riat-ah then an ni a, group tinah ram pali theuh an awm. Group stage bikah nitin match li khelin ni 12 chhung an khel ang a, hemi chhung hian round of 16 lut tur, group tin atanga pakhatna leh pahnihna a hriat theih ang. 
   

Final draw neih hunah chiah khelhna hmun tur chu organiser ten an puang chiang chauh ang. Hetia an tih chhan bul ber pakhat chu ram hrang hrang atanga TV (television) kal tlanga an en tlan theih hun tha ber tur an ngaih an thlang dawn a ni. 
    Euro 2020 anglo takin  hian pathumna zawn a ni ang.

An khelh dan tur tlangpui:
Group stage: November 21 - December 2
Round of 16: December 3-6
Quarter-finals: December 9/10
Semi-finals: December 13/14
Third place : December 17
Final: December 18   

Group game bik hi stadium pariatah khelh a ni ang. Chung an khelhna hmun tur te chu: 
Al Bayt Stadium, Khalifa International Stadium, Al Thumama Stadium, Ahmad Bin Ali Stadium, Lusail Stadium, Ras Abu Aboud Stadium, Education City Stadium leh Al Janoub Stadium.

Draw result:

Group A: Qatar, Ecuador, Senegal, Netherlands

Group B: England, Iran, USA, Wales/Scotland/Ukraine

Group C: Argentina, Saudi Arabia, Mexico, Poland

Group D: France, Peru/Australia/UAE, Denmark, Tunisia

Group E: Spain, Costa Rica/New Zealand, Germany, Japan

Group F: Belgium, Canada, Morocco, Croatia

Group G: Brazil, Serbia, Switzerland, Cameroon

Group H: Portugal, Ghana, Uruguay, South Korea