Kumin FIFA World Cup khel tur zingah ram langsar USA leh Canada an rawn lang leh dawn a, anni bakah hian Ecuador leh Ghana pawh an rawn kir bawk. A thlengtu ram Qatar pawhin an vawi khat nan FIFA World Cup an khel ve dawn.
   

Ram thenkhat FIFA ranking lama sang tak si, 2022 FIFA World Cup khel phak lo tur an awm nual. Player tha tak tak nei chunga qualify zo lo, mi mak tih khawpa che chhe ram an awm bawk. Kum 2018 World Cup khan football ram lian tak tak Italy, the Netherlands, Chile leh USA ten an khel phak lo. Kum 2014 khan Denmark, Sweden leh Serbia te pawh he tournament ropuiah hian an inlan phak tawh lo.

    Kumin 2022 FIFA World Cup-ah pawh hian tournament khel phak lo ram langsar tak tak an awm leh nual a, chung football khel thiam ram kan hmuh loh tur ram 5 te chu:
#5 Austria - Rank 30
    David Alaba leh a pawl te Austria hian,  playoff semifinal-ah Gareth Bale-a ngam lovin Wales lakah an tlawm a, Qatar lam an pan theih loh phah. Austria hi FIFA World Cup an inlan hnuhnun ber chu kum 1998 daih tawh kha a ni a, hemi tum pawh hian group stage an paltlang zo lo. Qualifying round-ah Denmark, Scotland leh Israel te hnuaiah awmin pali-na an ni. UEFA Nations League-a an chet that vangin playoff an khel thei hlauh a, mah se Wales lakah 2-1 a tlawmin an beiseina a thamral leh. 

#4 Chile - Rank 26
    Kum 2015 leh 2016 Copa America champion Chile pawh hi FIFA World Cup khel phak lo zingah an langsar hle a, anni ram hian CONMEBOL lamah qualifying khelin an tling zo lo hlauh. Team 10 zingah Chile hi pasarihna an ni phak hram a, anni aia che chhia Paraguay, Bolivia leh Venezuela chiah an awm tihna a nih chu. He team langsar ve tak hian qualify game 18 khelhah tum 9 an tlawm a, game 5 chiah an chak. Blackburn Rovers striker Ben Brereton bakah Alexis Sanchez, Arturo Vidal, Gary Medel leh Mauricio Isla te chu 2022 FIFA World Cup hi chuan an hmel kan hmu dawn ta lo. 

#3 Colombia - Rank 19
    Kum 2014 Brazil World Cup khan Colombia hi an inlan phak lo va, World Cup hnuhnung ber Russia 2018-ah khan Round of 16 stage an thleng phak a, mah se tunah an qualify zo leh ta lo. 
   

Colombia hian CONMEBOL qualifying intlansiakah 6-na an hauh phak hram a, Match 18 khelh-ah tum 5 chiah an chak thei a ni. Hun rei tak chhung an star midfielder James Rodriguez chu qualify an khelh lai hian a tel thei lo. Hlawhtling taka FIFA World Cup 2014 leh 2018 an inlan hnuah kumin World Cup chuan an hmel kan hmu leh dawn ta lo.

 
#2 Sweden - Rank 17
    Kum 40 mi Zlatan Ibrahimovic chuan international football a chawl zet hnuin international football lamah bawk World Cup khelh duh vangin a kir leh a, mah se 2022 FIFA World Cup khel turin a ram Sweden chu a chhawp chhuak zo lo. Ibrahimovic-a leh a pawl te Sweden hian Robert Lewandowski-a leh a hote Polish national team chu hneh lovin playoff-ah an pet chhuak a, he match-ah hian Poland chuan 2-0 a hnehin an World Cup khelh beiseina chu an tihtawp sak ta a ni. 

#1 Italy - Rank 6
 Tum hnih a zawna World Cup khel phak lo va Italy an awm tum khatna a thleng a, Euro 2000 champion Italy te chuan FIFA World Cup an khel phak dawn lo. Playoff semi-finalah mak tak maiin Italy hi North Macedonia lakah 1-0 a tlawmin an tla. 
   

World Cup-a Italy tel hnuhnun ber tum chu 2014 Brazil World Cup kha niin group stage an paltlang lo. Kum 2018-ah an khel phak ta lo a, tichuan theih tawp chhuahin an bei a, kawng tam takah insiam thain Euro 2020 an rawn champion bakah FIFA ranking-ah pawh 6-na an rawn ni phak hial, mah se team 32 telnaah an tel phak dawn ta lo.