2022 nipui transfer hman mek a ni a, Europe-a league lian zual 5 atangin club ten an team tih chak natur player tha chan loh hlauin fimkhur leh uluk takin an bazar mek.  

Europe-a league lian panga  Premier League, La Liga, Bundesliga, Ligue 1 leh Serie A atangin club hrang hranga lut chhuak hi player 284 an awm der tawh a, chung player insawn kualte leina senso chu pound maktaduai 919.6 zet a tling der tawh. 
    Tun nipui transfer-ah hian player tha tak tak an in sawn kual nual a, tun tumah hian chung zinga hming langsar zual player 10 te kan tar chhuak dawn a ni.  
1. Aurelién Tchouaméni: Kum 22 a upa France Aurelién Tchouaméni hi Monaco defensive midfielder niin ram lama a khelhpui thin Kylian Mbappé chuan a khelhna club PSG zawm turin a thlem ngial a, mahse a duhthlan Real Madrid lam a zawm ta zawk. 
    European champion team tana thil ropui tak hnutchhiah a duh thu sawitu  Monaco midfielder hi Liverpool pawhin lei tumin an lo hel ve hman. Tchouaméni-a man hi £85.3million niin Real-ah hian kum 2027 thleng a cham ang. 
2. Darwin Núñez: Liverpool player lei thar Benfica forward hian Anfield lamah jersey No. 27 a ha dawn a, Uruguay hmatawng Nunez lalut tur hian  Liverpool hian €75million zet an seng a, a fee bakah hian euro maktaduai 25 add-ons atangin an pek belh a ngai dawn bawk. 
3.Erling Haaland: Tunlai forward zinga thawm lian ber pakhat Erling Haaland chu Borussia Dortmund atangin Manchester City-in £51.5 million-in an lei chhuak a, kum nga chhung Etihad lama cham tur Haaland hian City tana a khel tur chu, a inchhuan hle thu a sawi. 
5.Federico Chiesa: Federico Chiesa hi Euro 2020 Champion Italy winger a ni a, Fiorentina a khel mek hi tunah a inhliam mek chungin Juventus lam chuan an kianga khel nghet turin £34.1 million sengin an la lut. 
6. Nuno Mendes: Sporting defender rinawm Mendes chu Ligue 1 lamah a chetthat em avangin Paris Saint-Germain chuan an it thlu ngang a niang €40 million sengin a nghet a chhawr turin a lei. 
7. Fábio Vieira: Porto playmaker hian season liam tak khan league-ah goal 14 a thun a, Portugal senior team lamah khel phak rih lo mah se nikum U21 Euro-ah khan ‘player of the tournament’ atan an thlang. Vieira hi  Arsenal chuan £34 million-in a lei chhuak.
8. Karim Adeyemi: Red Bull Salzburg forward Adeyemi hian season liam ta khan Austria lama goal 23 a thun a, tun season chu Borussia Dortmund lamin an kianga khel turin £32.1 million-in an lei chhuak. 
8.Sadio Mané: Liverpool tan ropui takin a inlan a, Liverpool-in Premier League leh Champions League-ah pahnihna an nih theihnaah khan a thawh hlawk em em. Hlawh sang zawk beiseiin Bayern Munich lamah a insuan lut ta a ni. Anfield-a kum 6 a cham chhungin goal 120 a thun bakah major trophy paruk a chawi hman a, a man hi £35 million a ni. 
9. Diego Carlos:  Sevilla Centre-back chuan Aston Villa zawmin club site-ah 'He hmuna ka rawn lut thei hi awih harsa ka ti zawk, Premier League ka khel tur hi mang ram a ang hial zawk' tiin a ziak. Villa hian Sevilla hnenah Diego Carlos-a man £26 million an pe. 
10. Yves Bissouma: Spurs boss Antonio Conte chuan central midfielder an mamawh thu a sawi fo va, an mamawh chhanna turin Brighton midfielder Yves Bissouma chu an lalut hmiah. Tottenham Hotspur hian Bissouma manah Brighton chu £35million an pe.