ZALEN October 1, 2023 : Excise & Narcotics Department (END)-in kum 1995 atanga a chhinchhiah chinah kumin hi Mizorama heroin man tam ber a ni a, kumin thla riat chhung lekin kg 63 chuang man a ni tawh.

END-in a chhinchhiah danin nikum 2022-a heroin man zawng zawng chu kg 33.41 niin, hei hi kumin thla riat chhungin khum a ni der tawh.

Kuminah heroin kg 63.37 man a nih tawh bakah ruihhlo dang man pawh a tam hle a, ganja man tawh zawng zawng kg. 85.77 tlingin Methamphetamine ringawt pawh kg 32.84 man a ni tawh. 

Kumin January leh August inkarah tual chhunga siam rakzu man chu litre 54,785.45 a tling a, zu bilh lai tin 1,32,464 man bawkin dawidim kg 511.57, sapzu um puitling 13,748, a chanve um 2,325 leh 180 ml um 2,352 leh beer chi hrang hrang thahnem tak man an nei tawh bawk.

Kumin hi damdawi leh zu chungchangah ramdang mi (foreigner) man tam ber kum ni bawkin mi 66 man an ni tawh a, nikum chhung khan mi 48 man an lo ni tawh.

END-in heroin an man dan:

Kum    Man zat
2023    Kg 63.37
2022    Kg 33.41
2021    Kg 18.90
2020    Kg 11.71
2019    Kg 12.59
2018    Kg 8.71