Aryna Sabalenka leh Novak Djokovic te chu 2023 ITF world champion atan an puang.

International Tennis Federation chuan Sabalenka leh Djokovic te hi chawimawina an hlan tawh a. Anni pahnih hi singles player zingah chuan kumin chhunga Grand Slam event neih vawi li-ah semi final an thleng vek a ni.

Djokovic tan chuan ITF World Champion chawimawina hi thil thar a ni lem lo a, vawi riat a dawnna niin, hetiang zat dawng thei awm chhun a ni a. Kum tawpah ATP No. 1 niin, he dinhmun pawh hi vawi riat a luah ta a, record a tling leh bawk a. Australian Open, French Open leh US Open title te lain, trophy lian hi 24 a la tling tawh a ni.

Serbian star Djokovic chuan, “Kum tawpa No. 1 nih theih hi chu lawmman zawng zawnga hlu ber ka ti mai a, hetiang dinhmuna din theih hi tennis player zawng zawng duhthusam a ni. No. 1 nih theih hi thil harsa em em mai a ni a, Grand Slam title lak theih leh No. 1 nih theih hi chu he infiamna tiropuitu an ni,” a ti.

Australian Open champion Sabalenka tan chuan ITF World Champion chawimawina hi thil thar niin, tun tum hi a vawi khat dawnna a ni a. Kumina Australian Open title a lak pawh kha Grand Slam title a lak hmasak ber a ni bawk a. US Open-ah pahnihna niin, French Open leh Wimbledon semi final a lut ve ve bawk a. Kumin September thlaah khan WTA ranking-ah a vawi khatna atan No.1 a ni a, kum tawpah No. 2 niin, a chungah hian Iga Swiatek a awm a ni.

Sabalenka chuan, “Kum 2023 hi ka tan chuan kum ropui em em mai a ni a, ITF World Champion atana min puang te hi ka lawm hle a ni. A vawi khatna atan Grand Slam title ka la a, Australian Open champion ka ni thei a, chu mai bakah world No. 1 te hial ka ni ve kha awih a harsa lek lek zawkin ka hria. Ka chhungte bakah ka team te leh min tantute zawng zawng zawng chungah lawmthu ka sawi,” tiin a sawi a ni.