Aizawl February 24, 2024 : Mizoramah kumin chhungin ruihhlo vanga thi mi 10 an awm tawh a, kum 1984 atanga kumin thlengin ruihhlo vanga thi mi 1,820 an awm tawh a. Hetihlai hian Mizoram police-ten nikum chhung khan ruihhlo chi hrang hrang Rs. Vbc. 49 chuang hu man an nei.

Exise & Narcotics department hotute hnen atanga ZALEN thudawn danin kumin chhungin tun February 23 thleng khan ruihhlo vanga thi mipa pakua leh hmeichhe pakhat an awm a, chungte chu heroin leh damdawi dang tihpawlh vanga thi an ni.

Nikum chhung khan Mizoramah ruihhlo vanga thi mi 74 an awm a, chung mite chu mipa 62 leh hmeichhia 12 an ni a. Nikum kha kum 2004 hnu lama ruihhlo thihpui tam ber kum a ni. 

Excise & Narcotics department chhinchhiah danin kum 1984 atanga kumi thlengin ruihhlo vanga thi mi 1,820 an awm tawh a, chung mite chu mipa 1,600 leh hmeichhia 220 an ni.

Hetihlai hian nikum chhung khan Mizoram police-te hian heroin kg. 68.55, methamphetamine kg. 154.172, crystal meth kg. 49.05, ganja kg. 112.943, pseugoephedrine kg. 210.71, opium kg. 4.918 leh codeine bottle 112 an man a. Police thil man hlut zawng hi Rs. 49,02,42,395 a ni.

Ruihhlo an man kaihhnawihah hian case 273 siam niin ruihhlo nena inkungkaih mihring 385 man an ni a, heng zinga 55 hi Myanmar lam mi an ni.