ZALEN Jan 20, 2026: Mizoramah nikum 2025 khan accident ṭum 73 a thleng a, mi 56-in nunna an chan a, mi 45-te’n hliam an tuar.

He thu hi Mizoram State Road Safety Council vawiina thutkhawmah transport minister Vanlalhlanan a tarlang a, thusawiin minister chuan, lirthei chungchanga dan kan neih that laiin, ‘road safety’ lama tan lak a ngaih thu a sawi a. India chu USA dawtah khawvela road network nei tha ber a ni a, km nuai 66 chuang a nei tih leh Mizoram kawngpui pawhin hma a sawn zel a, hmun hla anga ngaih thinte pawh hun rei lo te chhungin a thlen theih tawh tih a tarlang a. India rama road accident a pung chho zel tih leh hemi avanga thi leh hliam pawh an tam chhoh zel thu sawiin, he’ng accident zinga zaa 70 te chu lirthei khalh chak vang a ni, a ti a.

Minister chuan sawi zawmin, Ministry of Road Transport and Highways (MoRTH)-in a tarlan dan chuan kum 2024 khan accident tum 4,87,705 a thleng a, mi 1,77,177-te’n nunna chanin, mi 4,71,455-te’n hliam an tuar a; e-DAR atanga a lan danin Mizoramah nikum khan accident tum 73 a thleng a, mi 56-in nunna an chan a, mi 45-te’n hliam an tuar a ni, a ti a. Accident chuan mi tam tak nunna a lak mai piah lamah India ram hausakna pawh a nghawng a. MoRTH leh NITI Aayog-te chhut dan chuan kumtinin India GDP 2.5% atanga 3% thleng chu accident thlen avanga sensoah a hlohtir ziah thu a sawi bawk.

#ZalenNews