ZALEN February 1, 2026: Mizoramah nikum 2025 chhung khan Rs. 4,68,84,530 hu bungraw kang chhia a awm a, hetihlai hian tun hnai kum 14 chhungin kangmei vanga thi mi 51 an awm.

Fire & Emergency Services department chhinchhiah danin nikum chhung khan Mizoramah chenna in kang 31 awmin ram kang 164 a awm a, kangmei vanga thi pakhat a awm laiin hliam tuar pakhat a awm bawk.

Nikum chhunga kangmei chhuakah bungraw kang chhia Rs. 4,68,84,530 hu a awm a, kangmei chhuah nasat ber thla, March-ah chenna in kang paruk awmin ram kang 92 a awm a. Hemi thlaa bungraw kang chhia hlut zawng chu Rs. 3,00,62,330 a tling. 

Kum hmasa, 2024 chhung khan Mizoramah kangmei chhuak vanga bungraw chhia Rs. 8,84,57,960 hu a awm a, kangmei vanga thi pali an awm.

Kum 2012 atanga nikum 2025, kum 14 chhung khan Mizoramah kangmei vanga thi mi 51 an awm a, kangmei vanga thi awm tam ber kum chu kum 2022 niin mi 15 an awm.

Khua a thal tan a, kangmei laka himna turin Aizawl district bawrhsap chuan mipui hriat tur leh zawm tur a tichhuak a. Electric wiring uluk taka siam a, MCB hmang theuh turin a ti a. Gas hmanga eirawngbawl leh thing tuah thuk hmangten thuk hman zawhah uluk taka timit turin a ti.

Ram kalten ram kalnaa an meituah/chhem tha taka timit tur leh ar leh vawk vulhten an ran vulhna atanga kangmei tichhuak thei thuk leh electric hrui zam uluk zawk thlithlai reng turin a ti bawk.

Mi tupawhin zial zuk bung timit tha loa khawi hmunah mah paih loa kang mai thei thil – petrol/diesel/gas/khawnvartui zuarten kang thelhna hmanrua (fire extinguisher/sand bucket) inchhawp ngei turin a ti a. Hei bakah hian kangmei a chhuaha tanpuitu kan kohin chhiatna thlenna hmun chiang taka hrilh thin turin a ti.