ZALEN, July 3, 2025: India-in kum 2036-a Olympic Games thlen a tum meka Mizo a tam thei ang ber inlan an awm theih nana hmalakna kal mekah tun lai hian rit chawi chak zawngin Mizoram hmun hrang hrang fan mek a ni.

Mizoram Weightlifting Association (MWA)-in Weightlifting Talent Hunt a kalpui mekah hian a thawh khat nan Saitual leh Serchhip district huam chhungah naupang theihna nei tha zawngin Thawhlehni khan an feh chhuak a, Zirtawpni thleng hian khaw hrang hranga sikulte an tlawh kual ang.

Talent hunt-a feh chhuakte hi group thumah inthenin Group 1-in Sihfa Govt. Middle School leh Presbyterian English School, Keifang an tlawh tawh a, Ningani hian Saitual Govt. Middle School an tlawh leh ang.

Group 2-in Phullen khuaah hun hmang tawhin Phuaibuang leh Khawlian an kal dawn a. Group 3-in Presbyterian English School, Thenzawl leh Chawngbuangi Memorial School, Serchhipah hun hmang tawhin Ningani hian Presbyterian English School, Serchhip leh Good Will Academy, Serchhipah an kal leh ang.

Weightlifting Talent Hunt-a theihna nei tha naupangte hi Mizoram States Sports Council (MSSC) Weightlifting Academy, Ramhlun Sports Complex; Khelo India State Centre of Excellence (KISCE), Rajiv Gandhi Stadium, Salem, Mualpui leh Sports Authority of India (SAI), Mission Vengthlangah daha zirtirna tha zawk pek tura ruahman an ni.