ZALEN January 23, 2026: Public Health Engineering Department Minister Prof. Lalnilawma chuan nizan khan, AMRUT 2.0 hnuaia thawh tur, mahni in leh kawtkaia kartluana chatlak lova tui herhhaw theihna tur '24X7 Pilot Project', Vaivakawn leh Chawnpui veng hmun thenkhata kalpui tur chu a hawng. 

24X7 Pilot Project Report-a tarlan danin 24x7 water supply hna hi thla 4 atanga thla 6 chhunga zawh fel tum a ni.

He 24x7 System ah hian IoT (Internet of Things) leh Scada Unit te integrate (hmankawp) tum a ni a. Tui Level monitor na tur ultrasonic level indicator te, automated valve leh flow meter te tuizemah install a ni ang a, consumer 300 te hnenah smart water meter a thlawnin vuah sak theuh an ni dawn a, eng emaw zat connection pipe leh distribution network thar siam a ni dawn bawk a ni. 

Mobile Phone-a message leh thla lakte inthawn dan ang deuhin he system hian hna a thawk dawn a, consumer water meter reading te, tui a dawn zat te, valve hawn leh khar te, tui zem a tui level leh tuizem atanga tui chhuak zatte gate-way leh cloud storage hmangin communication, monitoring leh operation siam tum a ni bawk.

Mobile apps leh cloud storage-te hmangin a enkawltu Engineer ten Control Room emaw, an smart phone atangin emaw tuizem a tui leh meter dinhmun ten an vil reng ang.

He apps atang hian consumer ten an tui hman tawh dan te, tui an hman tam lutuk chuan warning an hmuin an en thei dawn bawk a ni.

He 24x7 System hian lang tlang, rintlak leh him tha, tui hnianghnar zawk consumer-te pek a tum a ni.