Aizawl: Nimin khan Lammual-ah Prime Minister Narendra Modi chuan 60 mega watt pe chhuak thei Tuirial Hydro Electric Project a hawng. Hawnna thu a sawiah Prime Minister chuan Tuirial HEP hawn a ni ta chu Mizoram tan mel lung pawimawh tak a ni a ti a. “Tuirial HEP hawn a nih tak avang hian Mizoram chu hmarchhak bialah Sikkim leh Tripura dawta power a intodelh thei state 3-na a ni a. Mizoram hian power siam chhuah theihna hmun tha tak tak a neih avangin state dangte hnena power hralhchhuak thei turin theihna a nei a ni,” a ti. Prime Minister chuan sawrkar laipuiin hmarchhak bial a ngaihsak tih sawiin, “Nimina siam tharCentral sector scheme thar North East Regional Infrastructure Development-ah chuan state sawrkar te tum ve ngai lovin central chuan 100% a tum tawh dawn a ni,” a ti a. Hmarchhak bial inkalpawhna kawngpui chei that hna pawh thawh a ni dawn tih sawiin state khawpuite chu rel lian chi a kalpawh tir vek tum a nih thu a sawi a. Permit hmanga mau hralh thin chu tihtawp a ni dawn tih sawiin hei hi kuthnathawktuten an hlawkpui dawn tih a sawi a, infiamna lamah Mizo thalaiten theihna an nei tih a sawi bawk. Prime Minister hian a thusawi tannaah Duhlian tawngin “Chibai vek ule, in dam em?” tiin bul a tan a, “In vaia chungah ka lawm e, mangtha,” tiin a thusawi hi a tlip leh a ni. Inlawmna thu sawitu Union Power Minister RK Singh chuan Mizoram chuan power megawatt 87 a mamawh mek nia sawiin mega watt 60 pechhuak thei Tuirial HEP hawn anih takah chuan Mizoram chu power ah a intodelh tawh dawn niin a sawi. Thusawitu dang Chief Minister Lal Thanhawla chuan Mizoram kawngpui te chu a chhiattawh avangin cheithat a ngai tih a sawi a. Hindi chawilar a pawimawh thu leh Mizoram chu pawna inthiar awm lohna ‘open defecation free’-ah puan theih thuai tum anih thu a sawi bawk. Prime Minister hian Lammual a hun a hman zawh hian Meghalaya panin a chhuak leh nghal a ni.