Aizawl: 64th Wildlife Week kharna inkhawm leh Reptile Enclosure sak thar hawnna hun chu Zirtawpni tlai khan Aizawl Zoological Park, Sakawrtuichhunah neih a ni a, Dr. CH.M Rao, IFS, Principal Chief Conservator of Forest (Wildlife) & Chief Wildlife Warden chu khuallian a ni. Khuallian Dr. CH.M Rao chuan, “Ramngaw leh nungchate pawimawhzia hriate tan chuan kar tin hi Wildlife week a ni a, ni tin hian tan kan lak thar a tul a. Kan ramngaw leh nungchate humhalhna kawnga pawimawh ber leh mawhphurna lian ber neitute chu mipuite hi kan ni a, hma la tur pawhin mipuite hi kan pawimawh ber a ni,” a ti. Dr. CH.M Rao chuan Aizawl Zoological Park-ah ramsa tam zawk a awm thuai theih nan hmalak a nih tur thu sawiin Zoological Park chu ennawm enna hmun mai ni lovin thangtharten nungchate hlutzia an zir thar theih nana hmanraw tangkai tak anih thu a sawi bawk. Wildlife Week hi October 1-7 chhung khan hman a ni a, hemi chhung hian a duh apiang tan Aizawl Zoological Park chu a thlawnin tlawh theih a ni. Aizawl Zoological Park-a Reptile Enclosure thar hawnah hian Cell 5 siam a ni a, Saphai 6, Satel 4, Telrang 2, Telpui 8 leh Chawngkawr 3 dah a ni. Reptile Enclosure thar hi nuai 32.59 senga sak a ni.