Mizoram sawrkar hnathawk inzawmkhawm Federation of Mizoram Government Employees & Workers (FMGE&W) chuan hlawh sang zawk, 7th pay hman ve an duh thu an sawi a. An thilngiat nawrnan hian December 6-8, 2017 chhung a huhoa chawlh lak ‘mass casual leave’ an rel a, ni hnih chhung chu an chawl hman a, mahse sawrkar nen an inbiakrem tak avangin December 8, 2017 (Zirtawpni) chuan dan pangngaiin pisa an kai leh a nih kha. FMGE&W te thilphut hi an thlirna atang chuan a awm ve hle ang tih a rin theih a, an hnathawhpui central sawrkar hnuaia thawk ten hlawh sang an lak tawh laia hlawh pangngai la lak reng chu a dik lo deuh a tih theih a. Sawrkarin sum harsatna a chhuanlam chunga sem tur a nei reng nia an hriat avang pawhin hlawh sang hi an beisei ve ni te pawhin a ngaih theih awm e. Mahse thil hi uluk taka ngaihtuah a ngai a, tun dinhmunah sawrkar hnathawk nghet mi 42,457 an awm mek nia hriat a niin heng mite hi 7th pay angin hlawh pek ni ta se kumtin sawrkarin hlawh atana a senbelh tur chu tuna a pek bakah vaibelchhe 563 niin mi thiamte chuan an chhut a. Tun dinhmunah hlawh atan sawrkarin state budget atangin 36-37% vel a hmang bawk a, hei pawh hi a pung nasa hle dawn a ni. Hei mai a ni lova sawrkar hnathawk nghet lo eng emaw zat an awm a, chumai bakah hlawhin a ken tel hamthatna hrang hrang nen chuan sum sen belh tur hi a tam hle dawn a ni. Mizoram sawrkar pawh hian a hnathawkte hi hlawh sang pek theih chu a duh ngei ang tih a rin theih a; mahse, a nghawng tur hi uluk taka a zirchian ve a ngai a, chu chu a tihmakmawh pawh a ni. Cheng 2/1 mai sen belhna tur a nih loh avangin uluk taka a nghawng tur nen a ngaihtuah a ngai a, chuvang chuan a zirchiangtu tur a ruat pawh hi a tihawm leh kalphung tur dik tak niin a lang. He zirchianna nghak hman lo khawpa hnathawktute an hmanhmawh hi chu a dik bik lo a ni. Mizoram sawrkar hnathawkte hi kan state sum dinhmun hrechiang ber tura ngaih an ni a, tuna an phut ang hian 7th pay hi pek ni ta se keini ang state pachhe tak, central a innghat hi engtin nge a kal ang a, mipuite hi engtin nge an awm ang tih an chhut ve a pawimawh. Lungawi lohna lantir chu a thiang a, mahse kan lantir danah hian mipuite harsatna leh tawrhna thleng zawng ni lo hram thei se a lawmawm khawp ang. Chu chuan mipui thlawp pawh an hlawh lehzual a rinawm bawk.