ZALEN March 9, 2026: Mizo Zirlai Pawl (MZP) leh Jt. Hnampual Students' Organisation te chuan Mizoram Legislative Assembly neih meka Education Minister leh Chief Minister ten 8th Schedule-a Mizo Tawng dah an remti ve anga an sawi chu thu dik tawk lo a ni a, Mizo Language Development Board (MLB) hnuaia Eight Schedules Study Group ten sawrkar hnenah thu dik tawk lo an thlen nia an ngaih thu an sawi.

Vawiiina Press Conference an koh-ah MZP chuan Mizoram State Legislative Assembly session neih mekah 'Eight Schedule of the Constitution of India-ah Mizo tawng hi telh tura hma lak ni rawh se' tih chu pass a ni a, hemi chungchangah hian NGO te leh MZP bakah Hnampual zirlai pawl hming te pawh lam tel a ni an ti. Anni chuan 8th Shedule chungchangah hian dinna nghet tak an neih thu leh hmanhmawh taka hmalak chu tul an la tih loh thu an sawi a, Chief Minister leh Education Minister thusawi chu thu dik tawk loh a nih thu an sawi.

MZP chuan MLB hnuaia Eight Schedule Group te nen hian tum hnih meeting an nei tawh tih an sawi a, heng meeting-ah hian MZP leh leh an hnuaia in affiliate Hnampual Zirlai Pawl te hian 8th Schedule-a Mizo tawng hi an pawmpui thu emaw an remtihna an la sawi chhuak lo hrim hrim tih an sawi a, session neih meka an pawmpui anga sawi awm chu thu thlen dik tawk loh vanga an ngai thu an sawi.

8th Schedule chungchanga hmalaknaah hian hman atanga MZP leh Hnampual zirlai hruaitute chu an ngaihdan a la ngai reng a, Zofa zawng zawngte Mizo-a lungrual taka luankhawm theih hun chu an nghahhleh leh duhthusam a nih thu an sawi bawk.