ZALEN, May 14, 2026: Vawiin tlai dar 3 khan Aizawl Press Club-ah Mizoram Chief Electoral Officer Dr. Lalrozama, IAS chuan kum 20 dana neih thin, a bik taka voter ennawn thawhpui 'Special Intensive Revision' neih a nih tur thu media te a hrilh. May 30 - June 28, 2026 chhungin BLO te In tinah an kal dawn a. Hemi hun chhung hian in lama hmuh theih mai turin mitin awm thei hram turin CEO chuan a ngen bawk a ni.

CEO sawi danin kum tinin electoral revision pangngai neih thin a ni a, hetah hian mitthi paih leh telh thar tur telh a ni tlangpui a. 

'Tun tuma Election Commission of India in ti tura min tih hi chu a dan a dang a. Roll revision hi a aia thuk zawk leh changtlung zawka neih tur a ni a, BLO te'n enumeration card nen In tin an tlawh dawn a, district lam pawh hrilhhriat an ni tawh a ni,' tiin a sawi a.

SIR ah hian mapping hman niin 2005 leh 2025 electoral roll chu enmil (mapping) a ni a. Hetah hian roll a awm tawh leh awm lote, an thlahte awm leh awm loh te enmil a ni a. Thisen zawmpui la awm zel zat chu 80.37% a ni.

Mizoram election lam chuan SIR hi 6.9.2026 ah revision neih zawh tur a nih thu a sawi bawk a ni.

Special Intensive Revision hi Mizoram chu Phase 3 naah ah awmin hetah hian state 16 leh UT 3 an tel a . Hemi hi then tet leh niin Mizoram rual hian Orissa, Sikkim leh Manipur-ah te SIR hi kalpui tur a ni a. 

CEO chuan SIR ah hian political party te chuan an aiawh an thehlut tur anih thu a sawi a, party te thlawpna a ngen bawk a ni.

Tunah hian Mizoram-ah voter 875,004 an awm mek a. Special Intensive Revision neih hnuhnun ber chu 2005 ah a ni.