Champion lai, Manchester City chuan Premier League chung ber an luah leh ta.

Tun season chu Arsenal kum tur emaw tih mai turin an kaltluang hman a, season hman meka hun 93% zet chu London club hian a chung ber boruak an lo hip ngar ngar tawh a; mahse, tunah chuan champion laiin an chhawk ve ta rih.

Pathianni zanah City hian 2-1 in Fulham an hneh a, Gunners aia khelh khata khel tlem zawk chungin point khatin an lehpel ta a ni.

City hian February thla laihawl hnua Arsenal chunga an chuan lehna hmasa ber a ni a, nomawi pathum - Premier League, Champions League leh FA Cup lak vek an tumnaah kawng dik an zawh zui zel.

League bikah phei chuan khelh khata khel tlem zawk chunga hma an hruai mek avangin an tan nomawi hi hnai lehzual anga sawi an awm pawhin a mak lem lo vang.

Intihsiakna hrang hranga an inlan hnuhnung vawi 18 zetah City hian tlawm an nei ta lo va, February 5-a an chak loh kha an chak loh hnuhnung ber a ni ta a. Premier League-ah khelh ruk an la nei a, heng zinga pangaah hian hnehna an chang a nih chuan nomawi an kawl lai an kawl chhunzawm ang.

Nilaini zanah tlakhniam hlau, West Ham United tlawhin Inrinni zanah London club aia dinhmun tha lo zawk, Leeds United an hmachhawn zui bawk ang.

Craven Cottage-a inkhelah hian Pep Guardiola chuan tun laia khawvela midfielder tha bera mi tam takin an chhal, Kevin de Bruyne chu ‘a damsam tawk lo’ tiin a khelhtir lo va, Bernardo Silva pawh bench-ah dahin Riyad Mahrez leh Julian Alvarez ten hun an nei ve thung.

Erling Haaland chuan minute 3-na lekah Tim Ream-a’n Alvarez-a laka penalty a chawi chu pet lutin tun season-ah goal 50 a thun tling ta. 

Fulham-in minute 15-ah Carlos Vinicius hmangin a sut nghal a, hei hi Cottagers-in goal-a an pet hmasak ber a ni nghe nghe a. Minute 36-ah December thlaa World Cup nomawi latu, Argentine forward Alvarez chuan pen 25 zeta hla atangin City hmahruaina leh chakna goal a thun zui leh ta a, a chung ber atang an chhuk thlir thei ta.

Haaland-a’n penalty a chhuih luh chiah khan kum 1931 daih tawha Aston Villa striker Tom ‘Pongo’ Waring-a’n English league sang bera ‘half century’ a siam hnu chu nihrualin a hnua siam leh thei hmasa ber a ni.

Norwegian striker hian a inkhelh hnuhnung vawi 12-ah goal 18 zet a thunna a ni ta bawk a. Premier League bikah a season khatna chauh ni mah se goal 34 a thun ta a, khelh 38 a awm china goal thun tam ber pahnih, Andy Cole-a’n Newcastle tana 1993-94 leh Alan Shearer-a’n a dawt chiah season-a Blackburn Rovers a champion-pui tuma a thun chu a nihrual.

Mi huai kal hmasa pahnihte hi a khum ngei a rinawm hle a, tunah hian khelh ruk an la bak a, a inhliam lo a nih chuan a inlan zui ngei a rinawm a, a goal thun theih dan enin a hlah reng a rinawm chiah lo bawk.