Aizawl : Mizoram doctor-te chuan state dang atanga Mizote an lo haw mek avangin fimkhur a ngai reng tih an sawi a. Health facility a that tawk loh avangin inven chu hmanraw tha ber nia an ngaih thu leh Covid-19 chu a darh palh a nih chuan kan tawrhna a nasa turah an ngai a ni.

Dr. Rosangluaia, Covid 19 Operational Team leh IMA Mizoram Branch President chuan, “Hripui mi thiam (Epidemiologist)-te chuan he natna hi kan ramah a darh zel a nih chuan mihring cheng Nuai 12 velah 30% (360,000)-in kai an thei ang a, natna kai zinga 80% (mihring 288,000)-te chu lang chhuak lem lo tura ngaih niin, damdawi in pan pawh ngai lem lo turte an ni a. Damdawi ina dah luh ngai tur hi 20% (mi 72,000) vel niin, 5% (mi 18,000) chuan ICU mamawh ngei tura ngaih an ni, 3% (mi 10,800) chuan ventilator an mamawh bawk ang” tiin ZALEN a hrilh.

Mizoram hian ventilator 110 a nei mek a, heng zinga 60/70 bawr hi chu damlo enkawlna atana hman reng a ni a, Mizoram damdawi inah hian khum 8000 awm anga chhut a ni.

IMA President chuan, “100% kan him hi a tih ngam lo a, Mizo lo haw mek an awm zela a, palh awm thei a ni a, enkawltute pawhin an kai palh thei a. Kan health facilty hi a len loh avangin hri leng invenna kan ti tha lo a nih chuan epidemiologist-te’n an chhutna ang ‘epidemic’ hi thleng thei a ni a, chumi thlen loh hram hi kan tum tur a ni a, a nih loh chuan kan tawrhna a nasa viau ang,” tiin ZALEN a hrilh.

“Inthawk khum atangin a kai theih niin an ngai leh tawh a, natna vei lang chhuak si lo/lang chhuak tlem tê hi a theh darhtu ber nia ngaih an ni a, taksa chak tha, thalai lam an ni duh a,hei vang hian mask vuah hi a pawimawh a. Mask vuah thatna ram apiangah he natna hi a darh chak lo a, 60%-in a punna hi a hniam niin an sawi a. Pawn chhuak leh dawr nghaktu pawh hian mask hi vuah zel a tha a, dawr nghaktute pawhin an customer te mask vuah lo chu hnar ngam mai sela,” tiin a sawi a. Local task force duty-te pawh social/physical distancing leh mask vuah chu zawm hram hram turin a ngen bawk.