Aizawl February 16, 2023: PC party chuan kan ram sum dinhmun hi siamthat theih ngeiah kan ngai a, "A duh phawt chuan kan CM, Finance Minister ni bawk Pu Zoramthanga hian kan ram sum dinhmun chhe zel hi a siamtha thei a, a duh leh duh loh ah a in nghat a ni," PC Party President Vanlalruata  chuan a ti. 

Vawiin hian PC Party Vice-President Lalrinmawii Fanai te In, Chhinga Veng-ah PC Party hruaitute chuan Mizoram state budget thlirhona an nei leh a, he huna budget chungchang sawitu PC President Vanlalruata chuan, "Mizoram sawrkarin chhiah leh thil dang hrang hrang atanga sum hmuh a tumna uluk takin kan zir ho a, mipui phur ti rit  si lo leh mipuiin kan chawi pangngai reng chawi chungin a lak khawm kawngah sawrkarin tan la se kan ram sum indaih lohna zualpui sutkian theih turah kan ngai," a ti.

Vanlalruata chuan, "Sawrkar hian mipui atanga a lakkhawm pawisa mipuiin kan pek ngei si sawrkara lut si lo nia lang te hi harsa lo takin sawrkarah a sengkhawm thei a, hemi kawnga hmalak dan hi PC Party chuan kan hriat avangin kan ram sum dinhmun chhe siamthat hi kan huphurh lo a, an ti duh a nih chuan tuna sawrkar pawh hian a siam tha thei ngeiah kan ngai a ni," a ti.

PC Party President chuan, "Mipuiin chhiah leh thil chi hrang hranga kan chawi, sawrkara lut silo te hi mipuiin kan ngaihven a kan zirchian a, sawrkar lakah pawh thîkthu kan tihchhiat a tul PC Party chuan kan ti hle a ni," a ti bawk.