March 6, 2023; Nizan dar 6:15 vel a a duty pui Havildar pahnih AK 47 a kaphlumtu, Havildar Bimal Kanti Chakma (56) chu Indian Constitution Article 311 hmangin a service atangin Commandant 2nd MAP in a Dismissed (ban) a, a kahhlum tak chhungte chu sawrkarin compassionate appointment a pe dawn.

Vawiin chawhma dar 11 khan IGP (hqrs.) John Neihlaia chuan DGP conference hall ah thuthar thehdarhtute kawmin, Hav. Bimal Kanti Chakma, 2nd Bn. MAP, Luangmual, Lunglei, Assam ramri Buapchep post-a duty chuan nizan dar 6:16 khan Buarchep-a an main camp bul, Oil Palm hmuna NCO Barrack-ah a silai, AK-47 rifle hmangin a thawhpuite a kap tih a sawi a, hetah hian Hav. J. Lalrohlua (51), 2nd Bn. MAP, Luangmual, Lunglei chu a hmunah a thi nghal tih sawiin, "Hav. Indra Kumar Rai (53), 2nd Bn. MAP, Luangmual, Lunglei pawh Vairengte CHC thlenpui a nih hnuin zan dar 7:20 khan a hliam tuar lovin a thi," tih a sawi.

John Neihlaia tarlan danin, e thil thlenna hmun hi Buarchep post-a camp pangngai atangin meter 400 vela hlaa awm a ni a, helai hmunah hian NCO pathum (3) te hi duty turin dah an ni. Hav. J. Lalrohlua ruang hi choka chhuatah hmuh a ni a, Hav. Indra Kumar Rai hi inkahna hmun atanga feet 40 vela hlaah hliampui tuarin hmuh a ni. 

Hav. Indra Kumar Rai hi Hav. Z. Biakthara chuan thil thlen dan a zawt a, Hav. Indra Kumar Rai chuan engmah inhnialna an neih loh thu leh Hav. Bimal Kanti Chakma hian silaia a rawn kah ringawt thu a sawi.

A hliam a nat em avang hian rang takin Vairengte CHC lam panpui nghal a ni a, amaherawhchu Vairengte CHC an thlenpui hnu, zan dar 7:20 khan a hliam tuar lovin a thi a ni.

Hav. J. Lalrohlua hi a hnung lam atangin a lu-ah kah a ni a, Hav. Indra Kumar Rai hi a awm (chest) veilamah kah niin a malpuiah silaimu hi a tlang a ni.

6. He thil thlenna hmunah hian an inkahna silai, AK-47 Rifle (Butt No. 60) leh magazine, silaimu 13 la awm chu man nghal a ni a. Silaimu kah ruah tawhna cartridge 15 bakah silaia la awm silaimu 1 pawh man tel a ni bawk.

Hav. Bimal Kanti Chakma (56 yrs) s/o Sigan Morot Chakma, Luangmual, Lunglei, Camp: Buarchep hi Police escort-na hnuaiah rang takin Vairengte PS lamah hruai nghal a ni a. A sawi dan chuan Hav. J. Lalrohlua leh Hav. Indra Kumar Rai te hian a zu ruih thin thu hi Post Commander hnenah an report thin a, hemi tlai (5.3.2023) hian anni pahnih hnenah hian eng vanga post commander hnenah report thin nge an nih a zawt a, a thin a rim a, a silaiin a kap ta mai niin a sawi a ni. 

Hav. Bimal Kanti Chakma hi CJM Court, Kolasib-ah Judicial Remand turin thawn nghal a ni a, tukin zing dar 1:30 khan Kolasib District Jail dah luh nghal a ni.

Hemi chungchangah hian Vairengte PS-ah case register nghal a ni a, a case No. chu Vairengte PS C/No. 12/23 Dt. 05.03.2023 U/S 302 IPC a ni.

 Hav. Bimal Kanti Chakma hi Indian Constitution Article 311 hmangin a service atangin Commandant 2nd MAP in a Dismissed nghal a ni. (vide Order No. No. 2BN/R-37/2023/3556 Dt. 6.3.2023)

He thil thleng hi communal thil ni lovin, mimal thil liau liau niin, zu in thin leh in thin lo tih thu atanga lo thleng a ni a. Vanduaina tawk ta Hav. J. Lalrohlua (L) leh Hav. Indra Kumar Rai (L) te ruang hi Vairengte atanga an khua Lawngtlai leh Lungleiah te Helicopter hmanga thlen turin hma lak mek niin, an chhungte pawh sorkarin compassionate appointment a pe ang.