October 13, 2023; Lunglei District Special Court (POCSO Act) chuan a fanu pathum pawngsualtu a puh chu thiam loh a chantir a, kum 20 jail tang tur leh pawisa chawi turin a hrem.

Lawngtlai District khaw pakhat-a pa pakhat kum 46 mi chuan a nupui awm loh hlanin, a fanu pathum kum 7, kum 10 leh kum 12 mite chu a lo pawngsual thin a. An pa-in a pawngsual thin thu hi an nu hnena tum thum an hrilh hnuin nikum August ni 5 khan Lawngtlai District Police Station-ah FIR thehluh a ni a, a hnu ni 9-ah pawikhawihtu-a puh hi Police-in an man a ni. 

He thubuai ngaihtuahtu Lunglei District Special Court (POCSO Act), Lunglei District and Session Judge ni bawk, Vanlalenmawia chuan pawikhawihtu-a puh hi Zirtawpni khan thiam loh a chantir a. Vawiin khan hrem a nih dan tur ngaituahin a puang nghal a.

Pawikhawihtu-a puh hi hursualna lak-a naupangte humhimna dan, Protection of Children form Sexual Offences Act Section 6 hmangin kum 20 chhung lung in tang tur leh Rs. 10,000 chawi turin a hrem a. A sum chawi tur hi a pe thei lo a nih chuan ni 20 dang a tan belh a ngai dawn a. Hei bakah hian IPC Section 506 hnuaiah kum 1 tang turin a hrem bawk.