Bruno Fernandes chuan league-a a goal 100-na thunin Manchester United-in si khat faiin Aston Villa an hneh a, Champions League khelh an inbeiseina a tisang lehzual a, Unai Emery team tan erawh vawi 10 tlawm an neih tawh loh titawptu a ni ta thung.

Portugues midfielder hian chawlhlawk hma minute ruk a la awmah Emiliano Martinez-a’n Marcus Rashford-a pet a lo dan per kal zelah thunin point thum hmuh nan a tawk.

Old Trafford-a inkhelah mual neitu hian chak an phu zawk a, Marcel Sabitzer-a’n a thun belh tep a. Casemiro-a’n goal kham a pet per bakah second-half-a a pet pawh a lut teuh hle bawk.

Season thara Europe-a inlan tum, Emery hnuaia harh tharna chang mek, Villa tan hun tawp dawnah corner atanga ball kal hmangin Ezri Konza chuan a sut teuh hle bawk.

League-a goal 100-na thuntu, United innghahna pakhat, Portuguese playmaker Fernandes-a hi Sporting Lisbon atanga kum 2020-a an lak luh kha niin tun thleng hian goal an nawrna kawnga mi pawimawh ber a ni deuh zel a. Red Devils kawr hain vawi 178 a inlan ta.

United boss Erik ten Hag pawhin Fernandes hi a fak zui a, “A smart-na piah lamah team tan chakna a pe a. A tumruhna, a tlawm duh lohna leh a beih hram hramna hi a hlu a. Hnehna chang tur leh nomawi la tur chuan hetiang player hi kan mamawh a ni,” a ti.

Dutch manager hian Fernandes-a ang chi player nena thawhho chu a phurawm niin a sawi a. Captain atana an hman thin sawisel deuhna awm thin pawh ‘mak’ a tih hial zawk thu a sawi.

Portuguese midfielder hi an captain pangngai, Harry Maguire a khelh loh changa a ban hren hren chhawktu a ni a, Villa lakah pawh hrengtu a ni.

Inkhelh tan hmain anmahni tantuten khelmual pawnah club neitute laka lungawi lohna an lantir karah point thum an hmuh hmangin United chuan a sang pali zinga tel an tumnaah dinhmun tha an luah phah a. Villa tan erawh palinaa awm mek, Red Devils hi point kua zetin an thlauh phah ta rih a, inkhelh hmaa an inkar point thuma tihzim an tumna a hlawhchham.

Villa hian November thlaa Arsenal boss hlui an lak luh lai khan 17-na daih niin tlak hniam an hlau kha a ni a, tunah erawh Europe-a inlan an sawi ri a; mahse, an chunga mi an ngam ta lo va. Khelh li an la neihah anmahni ang bawka khawmualpui huap inelnaa inlan tum thiau - Tottenham, Liverpool leh Brighton an la hmachhawn dawn a, kawng hautak tak zawh tur an la nei.

Europa League vawi li lai lo la tawh, Emery a la beidawng lo va, “A sang 10 zinga lang tura kan beih lai kha a harsa zawk,” a ti.

Villa boss chuan “Chu chu kan lo hlen tawh a, tunah hian kan tih leh a ngai ta a. Rahbi khirh tak kan hmaah kai tur a awm a; mahse, kan phu miau si,” a ti.