A hmangaih nî a kin nî chuan a kawngkaah pangpâr kual (wreath) a intâr ta! Amah lah chu nakin lawkah he leia a zâl hlenna tûr hmunah an zâwn bo mai tawh dâwn si a…
‘Ka dam chhûngin ka hmangaih reng ang che,’ a ti thin kha a ni a. A thiante paw’n kan hriatpui vek khawpin a ni, a hmangaih êm êm reng thin ni—nimin thleng pawh khan.
Kha thu, hmâna a hmangaih ber hnêna a dam chhûnga a hmangaih reng tawh tûr thu a hrilh lai khan, a ti tak tak a. Mahse, a Hmangaihi chuan, hun liam zêlin a liampui maia a la theihnghilh chhawm ve mai a rin thuin a chhâng liam mai thin.
Mahse, ani thung chuan a thinlung chhûngrilah amah kha a la hmu reng thin a. A thlalâkte paw’n a bang an la màwi fan reng a. Ama hnên atanga lehkhathawn a dawn zawng zawngte lah chu, a khum hnuaiah thulkhungin tlatin a la vawng tha khiu khiau vek a—1962 ami te pawh kha. ‘Ka hmangaih che’ tih inziak lai zawng zawngte chu a hnuaiah pen tui senin a rîn râng rei ruai vek bawk a ni.
Hun hei leh chen hi a hmangaih ta. Â ruai khawpin a ni, ani chuan hmân atâ tawh vawiin thlengin, angai renga a la hmangaih reng a, a hnên pana a rawn lêt leh hun tûr chu a la nghâh fan fan reng ni!
Hun leh nîte chu, muang chângin an inher liam ve chhet chhet zêl a. Vawiin pawn amah chu ka va tlawh ve leh a. Mahse, ni dang a ang tawh lo! Ni dang chu nimin lam thil a ni tawh si a—mittui nêna a rawn kîr leh hun tûr, ring fâna a nghah fan fan nîte kha. Vawiin chuan a tap hmêl hmuh leh tûr a awm tawh lo mai ni loin, kum hei leh chen ka hmuh ngai loh, a nui hmêl chu ka hmu ve ta! Mahse, amah chu, ‘hruai bo’ inpeih diamin a ni an lo sâwngbâwl fel vek tawh ni!
Kan lo rin leh beisei rûk thin ang ngeiin a Hmangaihi chuan vawiin khan a rawn tlawh ve leh ta ngei a. Mahse, hun rei tak chhûng, amah a hmangaihna a kin nî a ni tawh si! A lo sawi lâwk tawh angin, ‘A dam chhûngin a lo hmangaih tawh’ si a!
Vawiin chuan a hmangaih nî a kin ta! A kawngka biangah pangpâr kual intârin a kuang chhûnga a ruang chu an kal bopui mai tawh dâwn si … A hmangaihna chuan ‘akin nî’ a hmuh tâk miau avângin!
He hla, ‘He Stopped Loving Her Today’ hi George Jones-a record niin April 1980-a tlângzarh a ni. Ruihhlo avanga hun harsa leh khirh tak a tawrh hnu, kum ruk hnua Chart-a No. 1 single a neihpui leh theih hmasa ber a ni. Bobby Braddock leh Curly Putman te phuah niin kum 1978 khan producer Billy Sherrill chuan he hla hi Jones a pê a. A tir chuan Jones hian a record duh lo a. A chhan chu, mawi a ti hlawl lo a ni! ‘A hla hi a lungchhiatthlâk a, tu ma’n an ngaithla duh lo ang… a thlûk hrim hrim pawh hi ka ngeizâwng tak a ni…’ tiin George Jones hian a sawi chhuak a; kum khat chuang record lohin a kawl reng a ni.
A’n record hnu chuan namên loin hlawhtlinna, Chart lamah mai ni lo a dawng chho ta mawlh mawlh mai a! Grammy Award, 1980-ah ‘Best Male Country Vocal Performance’ dawngin 1980 Academy of Country Music-ah ‘Single of the Year’ leh ‘Song of the Year’ a dawnpui a. Hei bâkah hian Country Music Association chuan 1980 leh 1981-a ‘Song of the Year’ atan an thlang bawk a ni.
He hla hi George Jones-a ‘hla chuam bîk liau liau’ anga ngaih a nih avangin zaithiam dangte pawn sak chhâwn (cover) an ngam ngai lo hial thin a ni.
Kum sarih kalta, vawiin ang (26 April, 2013)-ah khan, Country Music ‘Mi Lian’ berte zinga mi George Jones chuan kum 81 mi niin a hmangaih, a nupui fanaute leh Country Music a hmangaihna chuan kin nî a hmu ve ta! ‘George Jones anga Country hla i sa ve thei a nih loh chuan George Jones i ni lo a ni mai,’ ti hiala an lo sawi thin, George Jones thlahna leh vuina inkhâwm chu, May 2, 2013-ah Country Music khawpui Nashville-a Country Music Inpui Grand Ole Opry-ah hman a ni. Amah ngaisângtu leh Country music thangchhuahpuitu mipui an fuan khâwm nî chuan, Grand Ole Opry-ah meuh pawh nui leh hlim hmêl hmuh tûr tu mah an awm tawh lo—nguiin an nguai zo vek a, a tam zâwk an tap a!
George Jones vuina inkhâwmah hian, country stars lâr ber ber, Jones nena inkungkaihna thûk tak neiten thlahna hla an sa hlawm a (Tanya Tucker & the Imperials – ‘The Old Rugged Cross’; Randy Travis – ‘Amazing Grace’; The Oak Ridge Boys – ‘Farther Along’ ; Charlie Daniels – ‘Softly And Tenderly’; Travis Tritt – ‘Why Me Lord’; Barbara Mandrell; Kid Rock – ‘The Best Of Me’; Vince Gill & Patty Loveless – ‘Go Rest High On That Mountain’; Brad Paisley– ‘Me And Jesus’; Ronnie Milsap – ‘When The Grass Grows Over Me’; Kenny Chesney – ‘Who's Gonna Chop My Baby’s Kindlin’; Wynonna Judd – ‘How Great Thou Art’). US First Lady hlui, Laura Bush pawn thusawina hun tawi a hmang ve bawk.
Vuina hun tâwpah Pastor Mike Wilson chuan Country Music Arsi lian thlahna thuchah sawiin a tawngtai a. Vuina inkhâwma hla sak tûr pakhat an dah bân a awm—chu chu a puala sak âwm ngawih ngawih, amah George Jones pawn a dam laia mipui hmaa a hla sak hnuhnun ber ‘He Stopped Loving Her Today’ a ni.
A sa tûr âwm tak, Alan Jackson chuan lungrun tak maiin a rawn sa ta. Country Music stars leh fans, Opry House-a pungkhâwmte chuan, mittui nen ding chungin an zah rawn George Jones chu an thlah ta a ni. Biak ina lukhum phawka zai tûra an sâwmna pawh cancel thak thak thin Alan Jackson meuh paw’n, amah hre chiangtute mak tih tûrin, hla a sak zawh hian, George Jones-a zahna lantir nan a lukhum a phawk ve hial nia!
A luh leh ngai miah lohna tûr Opry House atang chuan Woodlawn Memorial Park lama lei dàia zalh tûrin a band member thinte chuan George Jones kuang chu an zâwn chhuak ta a ni.

He Stopped Loving Her Today - George Jones
He said I'll love you til I die
She told him you'll forget in time
As the years went slowly by
She still preyed upon his mind

He kept her picture on his wall
Went half crazy now and then
He still loved her through it all
Hoping she'd come back again

Kept some letters by his bed
and in 1962
He had underlined in red
Every single I love you

I went to see him just today
Oh but I didn't see no tears
All dressed up to go away
First time I'd seen him smile in years

He stopped loving her today
They placed a wreath upon his door
And soon they'll carry him away
He stopped loving her today

You know she came to see him one last time
Oh and we all wondered if she would
And it kept running through my mind
This time he's over her for good