Aizawl: Kum kal mek 2022-23 chhungin Mizoram sawrkarin Aizawl Municipal Corporation (AMC) hnena a sum hlan/pek tur a hun taka a pek theih loh vangin sawrkarin Rs. Nuai 22.15 a chawi (penalty interest) tawh.

Assembly Budget Session neih meka C. Lalsawivunga zawhna, finance minister, Chief Minister Zoramthangan ziaka a chhan danin, 2021-22 chhungin sawrkarin penalty chawi a nei lo va, kum kal mek 2022-23 a Rs. Nuai 22.15 a chawi chu fund allocation hmangin ni 2.6.2022-ah UD&PA department-ah pek a ni.

Sawrkarin AMC pawisa hmuh tur a hun taka a pek loh chhan finance minister-in a tarlan danin finance commision-in Urban Local Body atana pawisa a recommend te chu a zat hriat lawk a nih avangin a nodal department UD&PA hnuaiah advanced allocation-in budget estimate-ah dah sa vek a ni a. Amaherawhchu fund hi finance ministry atanga actual release hmuh a nih hma chuan hman theih a ni lo.

Actual release hmuh a nih veleh department-in expenditure sanction an pawm hnuah treasury-ah bill an thehlut a, treasury atanga pass a nih hnuah a dawng tur local body (AMC)ah hlanchhawn a ni.

Heng kal tlang tur hian hun a duh deuh thin a, Finance Commission guideline-in a phut, ni 10 chhunga a fel hman loh chang a awm thin avangin penalty chawi a ngai.

Heng bakah hian treasury-ah system thar IFMIS hman a ni a, kalphung thlak lai a ni avangin harsatna a awm a, chu chuan hmalakna a ti kal muang ve bawk.