ZALEN, September 10, 2025: Leilung chhiatna thleng thei laka a him tawh lo leh kumin fur pawh tuar na tak, chief minister bial chhunga mi, Neihloh, Serchhip district chu a khaw puma sawn tuma hma lak mek a ni.

An khaw thuthmun a him tawh loh avang hian an khawtlang chuan a khaw ram chhung, an khaw thuthmun thlen hma deuhva khaw thar kai an duh a, hemi atan hian hma lak mek niin sorkar atanga hmasawnna hnathawhna tur sum an hmuhte pawh khaw thar atan an dah deuh zel tawh.

Khaw thar din tur chungchang hi Nilaini chhun khan CM Office-ah Chief Minister Lalduhoma hovin khaw awm dan tura duan (proposed plan) chu sorkar pawimawh leh khawtlang hruaituten an enho.

Ruahman dan chuan khaw tharah hian in 108 leh sorkar hmunhma pawimawh eng emaw zat a awm dawn a, ruahmannate hi Lalhruaitluanga Ralte, Asst. Director, Town & Country Planning-in a sawi fiah a. A hmunhma pawh a hma lama sam faia hmalak bul tan theih apiangah hma lak ni se an ti.

Khaw thar ruahmanna hi bialtu MLA kaihhruaina hnuaiah Town & Country Planning, UD & PA-in a siam a ni.