Kum 2014 atanga Mauricio Pochettino-a’n Tottenham Hotspurs a enkawl lai khan hun pawimawh tak takah Chelsea a lo ngam lo tawh thin a, tunah erawh Blues-in coach thar an zawnah a langsar ber niin an indawr fel pawh a rinawm ta hle.

Nomawi an lak hleihtheih loh avanga sawi hlawh thin, Spurs hi Argentine manager hian kum 2015 khan League Cup final a luhpui a, 2016-17 season khan Premier League-ah pahnihna a nihpui bawk a; mahse, heng inelna pahniha nomawi lak khalhtu chu Chelsea ve ve an ni.

May, 2016-a Chelsea nen an inkhelh tum pawh khan sawi a hlawh a, a kaihhruai team hian yellow card pakua zet an hmu.

Stamford Bridge-a inkhelah hian Spurs  hian 2-0 in hma an hruai tawh a; mahse, a tawpah 2-2 a inhnehtawkin point an hloh zarah Leicester City chu Premier League champion an ni zui ta hlauh.

Pochettino hi Champions League final a luhpui hnu lawk, November, 2019 khan Spurs chuan an bân zui a, hetih lai hian Premier League-ah 14-naah a awmpui.

Paris St-Germain-ah kala star rual a enkawl hnuah July, 2022 khan bân niin kum khat dawn hna a nei lo mek.

Chelsea hian Graham Potter thlaktu tur an zawng mek a. England midfielder hlui leh club leagend Frank Lampard chuan April thla tir atanga enkawlin vawi li a khelhpui tawhah a la tlawm vek.

Blues tana goal thun hnem ber hi a tirah chuan a ngheta chhawr zui theih tur ang pawha sawi rik ni mah se a result neihpui chinah tih rual a ni lo va, mi dang dap a ngai lo thei ta lo.

Chelsea hian Potter an bân hnua mi thar an dap zingah Bayern Munich boss Julian Naglesmann a langsar a, tunah chuan inbiak a tawp tawh a. Spain leh Barcelona manager hlui, Luis Enrique leh Premier League-a Burnley kaipuitu, Vincent Kompany pawh sawi rik ni mah se tunah chuan Argentine manager thawm a ring ta ber.

Indawr fel la awm chiah lo mah se chiang thawkhata ngaih a ni a, Lampard-a thlakin hna a tan nghal dawn nge season thar atang tih erawh a la chiang lo.