DOWNLOAD OUR APP

Read latest news on your phone
app-store

A nu chhungkaw hming tawm duh vanga hming thlak duh Lewis Hamilton

Mar 15, 2022

Formula 1-a tum sarih zet champion tawh driver tha hmingthang Lewis Hamilton chuan a nu Carmen-i te chhungkaw hming (surname) 'Larbalestier' chu a hminga put tel ve a duh vangin a hming thlak a duh thu a sawi.

Formula 1-a tum sarih zet champion tawh driver tha hmingthang Lewis Hamilton chuan a nu Carmen-i te chhungkaw hming (surname) 'Larbalestier' chu a hminga put tel ve a duh vangin a hming thlak a duh thu a sawi. 

Kum 37 a upa Briton hian a hming laiah 'Larbalestier' tih chu dah belh a duh a ni. "Ka chawrchhuahna chhungkua hi ka ngai ropui em em a, chuvangin ka nu hming-a Larbalestier tih pawh hi chhawm ve zel ka duh a, tun hnuah chuan ka hming laiah ka nu chhungkaw hming put thin chu chhawm ve ka duh tawh a ni," tiin Hamilton chuan a sawi. Sawi zawmin Hamilton chuan, "Ka nu hming hi Hamilton tih hian chhunzawm se ka duh tak zet a ni," a ti. 

Tun kar tawp hian Formula 1, 2022 season an tlan tan leh tawh dawn a, an intlansiak tur chungchanga an kawmnaah he thu hi sawi chhuakin, "Hmeichhia ten pasal an neih hnua an chhungkaw hming an chan daih mai thin hi kei chu ka hrethiam thei lo a ni," a ti. Mercedes driver Hamilton chuan a hming thlak tura beih chhunzawm zel a tum thu a sawi rualin tun Pathianni lo thleng tur a Bahrain Grand Prix-ah hi chuan a hming thar tur chu official-a a hman loh tur thu a sawi nghal thung. Hamilton a nu leh pa te hi a naupan laiin an inthen a ni. 

Season liam taah khan Max Verstappen nen intlansiak hnuhnung ber thlengin champion zawk tur zawngin an in el a, lap tawp berah Hamilton hi a elpui Max Verstappen chuan tlan pelin a champion zui. Season hmasa hre reng chungin Hamilton chuan champion ngei a tum tih a lang a,"He hmuna ka awmna chhan ber pakhat chu ka title pariatna la tura rawn kir leh ka ni," tiin champion ngei a tum thu a sawi. 

Share now