Aizawl; February 15, 2023, Nilaini zan dar 6:45 vela a nupui hlui, Lalropari (46), Champhai Kanan rawng taka ulhbun silaia kap hluma tlan bo zui ta, Lalropianga (43) chu he thu ziah lai thleng hian chin hriat lohin a la bibo a, a theih ang angin a chin chhui mek zel a ni.

ZALEN thudawn danin Lalropianga hi Champhai leh ramri depa awm police-te chuan a theih ang angin a chin an ngaihven chhunzawm zel a, Myanmar ram chhung, Khawmawi khuaa Zohnahthlakte chu police-ten thil awm dan an sawipui tawh a, a chin lo ngaihven turin an hriattir tawh.

Mipui sipai an tih, PDF-te pawh Lalropianga thlalakte leh a pawikhawih dante thawn an ni bawk a, chung bakah chuan Myanmar lama Zohnahthlakte chenna khaw hrang hrang hrangte chu an hmu a nih chuan a rang lama hrilh hre turin ngen an ni bawk.

Media hrang hranga tar lan a nih tawh angin, Lalropianga hian a nupui hlui, Lalropari chu Champhai Kanan-a an chenna inah luhchilhin rawng takin a kap hlum a, pawi a khawih zawh hnuah tlan bo zui nghal a ni.

Mi lirthei a ruk chhuah hmangin Zokhawthar lam a pan a, Zokhawthar bulah a lirthei hi hmuh ni mah se, he thu ziah lai thleng hian chin hriat lohin a awm zui a ni.

Rawng taka a pasal hluiin a kah hlum, Lalropari hi Champhai Kananah C. Kapzara in luaha khawsa niin, a nu, kum 90 mi vel leh a fapa naupang ber nena khawsa an ni a, sumdawnna leh a rem rem thawka inhlawhfa thin a ni. A ruang hi a boral zanah lumen niin, a tukah police ruahmanna anga postmortem a nih hnuah vuiliam a ni.