ZALEN Oct. 28, 2025 : Bawngkawn Police-te chuan October ni 26, 2025, Pathianni khan H Lalrammawii (31) d/o H Thangtinliana, Falkland Veng thattu ni ngeia hriat a pasal Zothanpuia (45) an man.

Thudawn danin, October ni 26 chawhma dar 10 vel khan H Lalromawii hi an chenna inah thia hmuh a nih thu Bawngkawn Police-in an dawng a. Police leh Forensic Science Laboratory-a mithiamte’n thihna thlenna hmun an pan nghal a, ruang an endik hnuah thah a ni ngei tihfinfiah a ni.

H Lalromawii hi a luah vuakna avanga kak a awm a, a taksa hmun hrang hrangah sawisakna duk leh pem eng emaw zat a awm bawk.

Thil thleng chungchangah hian H Lalrammawii pasal Zothanpuia chu Bawngkawn Police-te’n an man nghal a, thu an zawhfiah hnuah a thah ngei a nih thu Zothanpuia chuan a sawi.

H Lalromawii leh Zothanpuia te nupa hian fa pali an nei a, a ruang hi Civil Hospital, Aizawl-ah endik a nih hnuah an khua Kawlbemah vui tura lak a ni.

#ZalenNews