February 15, 2023; Zanin dar 6:45 vel khan Champhai Kanan vengah Lalropari (46) chu a pasal hlui Lalropianga (43) chuan an chenna in ah luhchilhin Ulhbun silaiin a kaphlum a. Tlanbo zui nghalin, Myanmar a lut hman nia hriat a ni.

ZALEN thudawnna in a sawi danin, an nupa hi kum 4/5 kalta vel a inthen tawh an ni a, fa pathum an nei a, Champhai Kanan Vengah Lalropari te hian C. Kapzara in an luah a, an fa naupang ber leh a nu kum 90 mi vel a chenpui a, thang khat lian vel Champhai Kanan vengah an awm tawh.

Lalropari chenpuite hi kum upa lam tawh leh naupang (rualban chiah lo) an nih avangin zanin a pawikhawihna thleng hi hriat a ni lawk lo a, an thenawm khawveng ten tap ri an hriata an pan chuan Lalropianga hi a lo bibo fe hman tawh a, Champhai Electric veng panin a tlanchhia a, a luhchhuah fona thin te in ah lutin, an motor (pik up) chahbi a la a, a tlan tlang a, motor hi zanin khan Zokhawthar daiah an hmu tawh a, amah chuan ral leh lam Myanmar a lut hman nia hriat a ni. 

Lalropianga hi driver thin niin, No 4 te a lo tawlh avangin Champhai Kanan chuan an vengchhung atanga an hnawhchhuahna a rei tawh a, permanent address chu sawi loh a temporary address pawh sawi chian theih a nei lo.

A pasal hlui kuttuar a boral ta Lalropari hi a rem rem thawk a sumdawng niin, zaninah lumen a ni ang a, police ruahmanna angin naktuk lamah postmortem a ni ang.